За Македонија ова е деветто учество на континенталните ракометни собири, а осмо по ред почнувајќи од 2012 година.
Групната фаза ќе ја играме во Хернинг, Данска, покрај домаќинот во нашата група се уште и селекциите на Португалија и Романија.
Ждрепката сакаше првенството да го стартуваме против најсилниот можен противник, првиот кандидат за златниот медал, селекцијата на Данска која ќе биде апсолутен фаворит во вечерашниот дуел.
„Го играме првиот натпревар против најдобрата екипа во светот во последните 10 години, Данска и возбудени сме што ќе играме против нив. Тие се домаќини, тоа ќе биде многу тешко за нас, но немаме што да изгубиме на овој натпревар и ќе се обидеме да уживаме во мечот“, истакна селекторот Кирил Лазаров.
Македонија својата шанса за бодови логично е да ја бара во дуелите против Португалија и Романија, а вечерва да се обиде да одигра колку што е можно подобро и да им покаже мускули на Данците.
Во втората фаза продолжуваат првопласираните две селекции од секоја група.
Распоред на Македонија на ЕП:
Македонија – Данска 20:30 петок (16.01)
Македонија – Португалија 18:00 недела (18.01)
Македонија – Романија 18:00 вторник (20.01)
