Исходот од овој натпревар беше познат уште при ждрепката, целта беше само македонските ракометари да го дадат максимумот и колку што е можно да му ја отежнат работата на главниот фаворит за златниот медал.
Македонија добро го почна натпреварот, бевме рамноправни во првите седумина минути, но тогаш следуваше серија на Данците од 5-0 кои поведоа со 8-3. Но, брзо го пребродивме падот и продолживме рамноправно да парираме до крајот на првото полувреме. На паузата се замина со водство на Данска од 17-12.
Во второто полувреме Данска ја зголемуваше предноста, ние игравме колку што можевме обидувајќи се да се носиме со моќниот противник. Како што одминуваше натпреварот данскиот селектор им даваше шанса и на ракометарите од втората постава, но и тие беа пресилни за нас. Конечниот резултат беше 36-24 за Данска.
Најефикасен во нашата селекција беше Серафимов со шест голови, Кузмановски и Митев постигнаа по четири. Кај Данска Питлик беше најдобар со девет голови.
Најтешкиот меч за нас помина, следен противник ни е Португалија со која играме во недела со почеток од 18:00 часот.
