Од лисабонскиот клуб тврдат дека станува збор за неосновани обвинувања и дека младиот аргентински играч е жртва на клеветничка кампања. Бенфика потенцира дека целосно застанува зад својот фудбалер и изразува доверба во неговата верзија на настаните.
„ФК Бенфика пристапува со целосен дух на соработка, транспарентност и отвореност кон активностите објавени денес од УЕФА, поврзани со наводниот случај на расизам за време на натпреварот против Реал Мадрид. Клубот јасно и недвосмислено го потврдува својот историски и бескомпромисен ангажман во одбрана на вредностите на еднаквоста, почитта и инклузијата, кои се темелни принципи уште од неговото основање и чиј најголем симбол е Еузебио.
Бенфика исто така повторно изразува целосна поддршка и доверба во верзијата што ја презентираше играчот Џанлука Престијани, чие однесување како дел од клубот секогаш се одликувало со почит кон противниците, институциите и принципите што го дефинираат идентитетот на Бенфика. Клубот жали поради клеветничката кампања на која фудбалерот е изложен“, напишаа од клубот.
Во меѓувреме, УЕФА информираше дека е отворена истрага за случувањата на стадионот „Да Луж“.
