Таа кажа дека посетата на Гаши на Тирана, која се случува брзо по нејзината посета на Скопје, ја потврдува блиската и интензивна соработка меѓу двете собранија.
„Албанија има за цел да се приклучи на Европската унија до 2030 година и овој датум е амбициозна, но остварлива цел. На овој позитивен момент за Албанија треба да се гледа позитивно од целиот регион. Членството во Европската Унија е процес кој се заснова на заслуги, спроведување на реформите и исполнување на стандардите на ЕУ, а не на други фактори или околности“, рекла Спиропали.
Таа оцени дека билатералните прашања меѓу земјите кандидати и земјите-членки на ЕУ не треба да бидат пречка во процесот на членство.
„Албанија се надева дека Северна Македонија ќе ја одржи Втората меѓувладина конференција со ЕУ што е можно поскоро, бидејќи нашите две земји се додадена вредност за ЕУ. Билатералната соработка на полето на европските интеграции е важна и затоа создавањето заеднички механизми за размена на информации и искуства ќе ја зголеми ефикасноста на реформите“, вели Спиропали.
Таа подвлече дека Албанија и Македонија се силно ангажирани во регионалните иницијативи, како што е Берлинскиот процес, кој помага за натамошно зајакнување на економските, социјалните и политичките врски.
„Албанците во Северна Македонија дадоа и продолжуваат да даваат значаен придонес во управувањето и зачувувањето на стабилноста на земјата и имаат одлучувачка улога во евроатлантските процеси и зачувувањето на ориентацијата на земјата кон Западот и западните вредности, толку важни, особено во актуелните услови на геополитичките случувања во Европа и пошироко“, кажала Спиропали.
Гаши ѝ честиташе на Албанија за почетокот на пристапните преговори со ЕУ и изрази очекување дека двете земји и понатаму ќе соработуваат на планот на европската интеграција. Беше подвлечено дека проширувањето е една од најдобрите политики на Унијата како геостратешка потреба и е долгорочна инвестиција за цела Европа во политичка, безбедносна и економска смисла.
Во контекст на парламентарната соработка, којa има бројни потенцијали, од страна на двајцата претседатели беше истакната можноста за поголема соработка меѓу комисиите за европски прашања и националните совети за евроинтеграција, со оглед на заедничките интереси на двете држави во евроинтегративниот процес.
Соговорниците истакнаа дека единствениот пат кон побрзо економско унапредување на Регионот е регионалниот пазар и заедничко интегрирање во истиот, бидејќи е природно добрите економски односи во регионот да бидат придружувани со добри политички односи и само на тој начин регионот реално ќе напредува.
