Делегатите одбија да го поддржат нацрт-документот во кој не се осудува Хамас по ненадејниот напад врз Израел во кој се убиени повеќе од 1.400 луѓе.
Советот се состана додека Израел се подготвува за копнена офанзива на Појасот Газа, откако во артилериски и воздушни напади се убиени најмалку 2.750 Палестинци.
Само четири земји гласаа заедно со Русија за предложениот нацрт, а четири други, вклучително и САД, гласаа против, додека шест беа воздржани.
Друг нацрт предложен од Бразил, во кој недвосмислено се обвинува Хамас, се чини дека има поширока поддршка и се очекува да биде изгласан вечерва, велат дипломатите.
Рускиот амбасадор во ОН Василиј Небензја рече дека и покрај неуспехот, резолуцијата го поттикнала советот на акција.
„Придонесе да се иницира суштинска дискусија во Советот за безбедност на таа тема. Без нашето охрабрување, сè би било ограничено на празни дискусии“, рече амбасадорот, пренесе агенцијата Франс прес.
Велика Британија, која им се придружи на САД во гласањето против рускиот предлог, ја критикуваше Москва за недостигот на консултации и напори за постигнување консензус.
„Не можеме да поддржиме резолуција која не ги осудува терористичките напади на Хамас“, изјави британската амбасадорка Барбара Вудворд.
Образложувајќи ја одлуката за гласање против, американската амбасадорка во ОН Линда Томас-Гринфилд ја критикуваше Русија што не го спомнува Хамас во документот и оцени дека ѝ дава покритие на терористичка група која „тероризира невини цивили“. Таа рече дека тоа е лицемерно.
Амбасадорката на САД додаде дека се согласува советот да преземе акција, но правилна.
Таа оцени дека Хамас ја предизвика хуманитарната криза во Газа и дека не може да се дозволи вината да се префрли на Израел и да се оправда Хамас за „децениската суровост“.
Амбасадорот на Израел во ОН Гилад Ердан праша дали советот ќе ја прифати борбата за цивилизација или ќе поттикне „геноцид од џихадисти кои имаат за цел да ги убијат сите неверници“.
Палестинскиот амбасадор во ОН Ријад Мансур рече дека морална должност на Советот за безбедност на ОН е да се обиде да го спречи израелското бомбардирање на Појасот Газа, во кое секој час гинат 12 лица.
Агенцијата на ОН за помош на палестинските бегалци предупреди дека Појасот Газа се соочува со хуманитарна катастрофа без преседан доколку не се обнови снабдувањето со вода и виталните производи.
