Во соопштението на Владата на Косово се наведува дека вредноста на работите на оваа железничка делница е над 164 милиони евра, додека над 200 милиони евра е планираната вредност за преостанатиот сегмент до Митровица и од Митровица до северната граница на Косово.
Курти изрази благодарност до Европската унија, Европската инвестициска банка и Европската банка за обнова и развој, за поддршката на финансирањето и рехабилитацијата на оваа железничка пруга, „која граѓаните на Косово уште повеќе ќе ги доближи до Европската Унија“.
„Овој проект со години се соочуваше со многу предизвици и пречки. Тие се надминуваат благодарение на решителноста на раководителите, инженерите и работниците на Косовските железници – јавното претпријатие Инфракос, нашето Министерство за животна средина, просторно планирање и инфраструктура, Министерството за економија… и Министерството за финансии, труд и трансфери“, изјави Курти.
Тој додаде дека „железницата е многу важна инфраструктура која го поврзува Косово со регионот и со Европа и го отвора патот на раст и развој“.
Министерката за економија, Артане Ризваноли рече дека штотуку отворената пруга нуди подобри можности за граѓаните и бизнисите, поевтин и побрз транспорт, додека министерот за животна средина, просторно планирање и инфраструктура Либурн Алиу изјави дека со оваа пруга Приштина се поврзува директно со Скопје и Солун.
Но, прашање е кога Косово ќе се поврзе железнички со Солун, имајќи предвид дека македонската железница е во катастрофална состојба и дека во моментов не сообраќа ниеден меѓународен воз, не е познато во каква состојба е пругата од Скопје до косовска граница. Останатите пруги низ Македонија се во лоша состојба, брзината на возовите е ограничена на 40-50 км на час. Поради лошата состојба на локомотивите укинати се домашни линии, па така од неодамна од Битола за Скопје вози само еден воз на ден. Македонија од пет држави со кои граничи нема и немала пруга кон две – кон Албанија и кон Бугарија.
П.Џ. Фото: Влада Косово
