Премиерот Роберт Голоб изјави дека неговата влада се согласила со одлуката за признавање на Палестина и дека мерката ќе биде поднесена до парламентот на конечно одобрување, најверојатно следната недела, објави новинската агенција СТА.
„Денес владата одлучи да ја признае Палестина како независна и суверена држава“, рече тој на прес-конференција во Љубљана, пренесе Ројтерс.
Потегот е дел од пошироките напори на земјите да го координираат притисокот врз Израел за прекин на конфликтот во Газа.
Голоб повика и на итен прекин на непријателствата меѓу Израел и Хамас во Газа и ослободување на сите заложници.
„Ова е порака за мир“, рече тој.
#Slovenia‘s PM says his government has decided to recognize #Palestine as an independent state, but needs parliamentary approval https://t.co/asRwQ0KSSg
— Middle East Online (@MeoNews) May 30, 2024
Словенечката влада подигна палестинско знаме покрај знамињата на Словенија и на ЕУ пред својата зграда во центарот на Љубљана.
Словенија го следи патот на Ирска, Норвешка и Шпанија. Тие земји официјално ја признаа независна Палестина претходно оваа недела. Шведска го направи тој потег пред десет години.
Сите овие потези го зајакнаа палестинското прашање во светот, но го налутија Израел.
Повеќе од 140 од 193 земји-членки на Обединетите нации ја признаваат Палестина како суверена држава. Западноевропските земји и САД долго време беа исклучок.
