Напуштањето на Дамаск од страна на поранешниот сириски претседател Башар ал Асад е „срамно и понижувачко“, изјави амбасадорот на земјата во Москва, Башар ал Џафари, во ексклузивно интервју во понеделникот за РТ арабик.
Во текот на викендот, џихадистите на Хајат Тахрир-ал-Шам (ХТС), заедно со други антивладини фракции, ја презедоа контролата врз Дамаск по брзиот напредок во неколку региони. Во неделата Асад и неговото семејство побегнаа и добија азил во Русија.
Коментирајќи ги случувањата, Ал Џафари го осуди поранешниот претседател и посочи дека тој одамна требало да биде соборен.
„Колапсот на корумпираниот систем за неколку дена е доказ за неговата непопуларност и недостигот од поддршка и во општеството и меѓу армијата и вооружените сили“, рекол дипломатот за РТ.
Тој додал дека „срамното и понижувачко бегство на шефот на овој систем под превезот на ноќта, без чувство на национална одговорност кон земјата, ја потврдува потребата од промените што се случија“.
Ал Џафари ја поздравил промената на режимот, наведувајќи дека Сирија „конечно стана вистинска татковина за сите Сиријци“ и го повика својот народ да се обедини и да соработува во враќањето на безбедноста.
„Новата ера бара надеж за мирни промени, избегнување понатамошно оштетување на Сирија и нејзиниот народ, бидејќи Сирија е земја со изобилство од добрина и благослови“.
Претходно во понеделникот, сириската амбасада во Москва го крена знамето на опозицијата откако ден претходно го спушти знамето на претходната влада. Неколку други сириски мисии низ светот исто така го кренаа новото знаме и го поставија на своите профили на социјалните мрежи.
Во меѓувреме, Кремљ потврди дека Асад и неговото семејство моментално престојуваат во Москва, но не соопштија детали за точната негова локација. Портпаролот на Кремљ, Дмитриј Песков, истакна дека одлуката за давање азил на поранешниот лидер била лично одобрена од рускиот претседател Владимир Путин. Тој, сепак, рече дека во моментов нема закажани средби меѓу нив двајца.
