вторник, 28 мај 2024

Сиљановска-Давкова со огромна предност оди во вториот круг на претседателските избори со Пендаровски

По обработени 99,03% од гласачките ливчиња, според првичните резултати на Државната изборна комисија најмногу гласови на вчерашните претседателски избори освои  кандидатката на ВМРО-ДПМНЕ Гордана Сиљановска Давкова – 362.682 (или 40,08% од излезените гласачи), пред Стево Пендаровски од СДСМ со 180.306 гласови (19,93%). Гордана Сиљановска Давкова поддржана од ВМРО-ДПМНЕ и коалицијата и Стево Пендаровски поддржан од СДСМ и коалицијата влегуваат во вториот круг од претседателските избори што ќе се одржат на 8 мај, истовремено со единаесеттите парламентарни избори во земјата.

Објавено на

часот

Сподели

Бујар Османи, кандидатот за претседател на државата на ДУИ освои 120.903 (13,36%), Арбен Таравари од коалицијата Вреди има 83.356 (9,21%), Максим Димитриевски од ЗНАМ има 83.787 (9,26%), Билјана Ванковска поддржана од Левица 41.172 (4,55%) и Стевчо Јакимовски од ГРОМ има 8.103 (0,90%).

Претседателот на Државната изборна комисија (ДИК) Александар Даштевски на последната прес-конференција синоќа пред полноќ истакна дека излезноста на гласачите според податоците од 3.156 избирачки места изнесува 49,75 отсто. На гласање излегле 810.971 гласачи. Важечки гласачки ливчиња се 789.031, а неважечки 21.946 гласачки ливчиња.

Право на глас имаа 1.814.317 граѓани запишани во избирачки список. Тие на 3.480 избирачки места можеа да се изјаснат за еден од седумтемина кандидати.

Конечните резултати од изборите ДИК ќе ги објави во рок од 24 часа од денот на нивната конечност.

За да се избере претседател во првиот круг, потребно е еден од кандидатите да освои мнозинство гласови од вкупниот број евидентирани избирачи, односно 907.159 гласови. Имајќи предвид дека никој не го доби потребното мнозинство, ќе се организира втор круг во кој одат двајцата кандидати кои добиле најмногу гласови – Гордана Сиљановска Давкова и Стево Пендаровски. Вториот изборен круг ќе се одржи на 8 мај, заедно со парламентраните избори.

Ова се седми непосредни избори за претседател од независноста на државата. Претходните беа одржани во 1994, 1999, 2004, 2009, 2014 и во 2019 година.

ТОП ВЕСТИ

ПОСЛЕДНИ ВЕСТИ