Како што информираат од МЖСПП, во обраќањето министерката Шукова посочила дека сме свесни за предизвиците како што се деградација на животната средина, климатски промени, загуба на биолошка разновидност, управување со отпад, енергетска транзиција, со кои се соочуваат земјите од регионот на Западен Балкан, но, нагласила дека на овие предизвици истовремено се гледа како на можности за раст и развој.
„Приоритетните акциски мерки се насочени кон забрзување на транзицијата кон обновливи извори на енергија, спроведување ефективни програми за намалување и рециклирање на отпадот, заштита и обновување на природните живеалишта и биодиверзитетот, промовирање на одржливи транспортни начини и инфраструктура. Сите овие предизвици треба да се усогласат со националните капацитети за апсорпција, со меѓународни договори и обврски поврзани со одржливоста на животната средина и други паралелни процеси во регионот, како што е новиот План за раст за земјите од Западен Балкан“, истакнала Шукова, додавајќи дека стратешкиот пристап на Македонија за забрзување на фундаменталните реформи за прогресивна интеграција со единствениот пазар на Унијата и социо-економската транзиција, како и усогласувањето со законите, правилата, стандардите, политиките и практиките на Европската Унија е во согласност со новиот План.
Министерката Шукова, во обраќањето се осврнала и на тековните напори во спроведувањето на принципите на кружната економија што, како што рекла, претставува трансформативна рамка за одржлив развој на Западен Балкан и е клучна за постигнување на националните, регионалните и глобални климатски цели.
Таа се осврнала и на позитивните искуства од имплементирани мерки и изразила задоволство што забраната за употреба на пластични кеси за еднократна употреба и забраната за употребата на производи спакувани во пластика во заштитените подрачја е препозната и поздравена од регионот.
„Нашиот предизвик е координација на сите тековни процеси на национално ниво, особено на известувачкиот, со цел сите акции, цели и мерки да бидат конзистентни и остварливи. Секако, насоките се јасни, тие се и дел од Софиската декларација и Акцискиот план за спроведување на Зелената агенда за Западен Балкан, како и законодавството на Европската Унија. Потребно е јавно-приватно, научната фела и невладиниот сектор, но пред сѐ, потребно е знаење и разбирање за очекуваните цели и задачи кои произлегуваат од законодавството на ЕУ“, потенцирала Шукова.
Како што велат од Министерството, фокусиран на кружната економија, овој настан имал за цел да ги идентификува регионалните потреби, да ги детектира недостатоците во финансирањето и да ја подобри координацијата меѓу донаторите, бизнисите, индустрискиот сектор, граѓанството и економиите на земјите од Западен Балкан, поттикнувајќи ги кон климатска неутралност што треба да се постигне до 2050 година.
