Бојата на жолчката е директно поврзана со видот на храната што ја консумираат кокошките. Кокошките кои се хранат со храна богата со каротеноиди, природни пигменти кои се наоѓаат во пченката, морковот, луцерката и разни видови зелена храна, произведуваат јајца со интензивно жолти или портокалови жолчки.
Од друга страна, кокошките кои имаат повеќе житарки во исхраната како пченица и овес несат јајца со бледо жолти жолчки.
Вообичаено е верувањето дека потемната жолчка значи поквалитетно и поздраво јајце. Сепак, бојата на жолчката не е сигурен показател за хранлива вредност. Истражувањата покажуваат дека јајцата со потемни жолчки може да содржат повеќе витамин А и лутеин, но овие разлики не се значајни, пренесува Сити магазин.
Кокошките кои имаат пристап до отворени пасишта и разновидна исхрана имаат тенденција да несат јајца со побогат вкус.
Покрај бојата на жолчката, често се поставува и прашањето дали бојата на лушпата од јајцето влијае на квалитетот. Бојата на лушпата, без разлика дали е бела или кафена, не влијае на хранливата вредност или вкусот на јајцето. Тоа целосно зависи од расата на кокошките, белите кокошки несат бели јајца, а кафеавите кокошки несат кафени јајца.
Иако бојата на жолчката може да открие повеќе за исхраната на кокошката, таа директно не го одразува квалитетот, хранливата вредност или вкусот на јајцето.
За најдобар вкус и хранлива вредност, се препорачува набавка на јајца од домашни производители кои на кокошките им обезбедуваат квалитетни услови и разновидна исхрана.
Без разлика на бојата на жолчката, јајцата се одличен извор на протеини и други важни хранливи материи за вашата исхрана.
