Албарес, пред состанокот, кажа дека целата меѓународна заедница би требало да ја признае независна Палестина бидејќи тоа е единствениот начин да се гарантира сигурност и стабилност за Израел и Палестина, како и за целиот Блиски Исток.
Тој додаде дека состанокот во Брисел ќе биде основа за светски мир и стабилност.
Како што наведе, европските министри за надворешни работи ќе се сретнат со колегите од Палестина, Израел, Египет, Јордан, Саудиска Арабија и генералниот секретар на Арапската лига, за да ги слушнат нивните ставови и да разменат мислења.
Албарес кажа дека ќе се залага и за неограничен пристап до хуманитарна помош во Газа, како и за предлогот на Шпанија да се одржи мировна конференција.
„Мировната конференција би послужила за имплементација на решението со две држави кои служи за создавање реална и одржлива палестинска држава“, додаде Албарес.
И високиот претставник на ЕУ за надворешна и безбедносна политика Жосеп Борел инсистираше на решение со две држави, порачувајќи му на Израел дека не може да гради мир само со воени средства.