„Спиралата на насилство на Блискиот Исток сега мора да запре: сè друго би претставувало огромен ризик за државите и народите во регионот“, му рече Шолц на Пезешкијан, според соопштението од кабинетот на канцеларот.
Шолц, исто така, разговараше со израелскиот премиер Бенјамин Нетанјаху во текот на викендот, изразувајќи ја својата загриженост за потенцијалната регионална војна на Блискиот Исток.
Во разговор со Пезешкијан, Шолц ја истакна потребата од прекин на огнот во Газа и враќање на заложниците киднапирани од Хамас. „Тоа би дало значаен придонес за регионалната деескалација“, рече Шолц.
Стравот од ескалација на конфликтот на Блискиот Исток се зголеми откако на крајот на јули во Бејрут беше убиен командантот на либанското движење Хезболах, Фуад Шукр, а во Техеран беше убиен политичкиот лидер на Хамас, Исмаил Ханија. Иран и Хезболах најавија дека ќе се одмаздат за тие напади, но тоа сè уште не се оствари. Во меѓувреме, нациите во светот ги повикаа своите граѓани веднаш да го напуштат Либан, а САД, најважниот сојузник на Израел, го зголемија своето воено присуство во регионот.
Шолц, британскиот премиер Кир Стармер и францускиот претседател Емануел Макрон повикаа на „деескалација и регионална стабилност“ на Блискиот Исток во заедничка изјава во понеделникот.
Тројката ги повика Иран и неговите сојузници „да не ја загрозуваат можноста за договор за прекин на огнот и ослободување на заложниците“ во Газа. „Ние, лидерите на Франција, Германија и Обединетото Кралство, ја поздравуваме неуморната работа на нашите партнери во Катар, Египет и САД за договорот за прекин на огнот и ослободување на заложниците“, напишаа Стармер, Макрон и Шолц.
„Се согласуваме дека не може да има натамошно одложување. Работевме со сите страни за да спречиме ескалација и нема да штедиме напори за намалување на тензиите и наоѓање пат кон стабилност. Борбите мора да престанат сега и сите заложници кои се уште ги држи Хамас мора да бидат ослободени. На народот во Газа им е потребна итна и непречена испорака и дистрибуција на помош“.
