понеделник, 26 февруари 2024

Шефот на ОН: Војните во Газа и Украина сериозно го поткопаа авторитетот на Советот за безбедност

Генералниот секретар на ОН Антонио Гутереш изрази жалење поради неуспехот на Советот за безбедност на ОН да одговори адекватно на војната меѓу Израел и Хамас во Газа и руската инвазија на Украина, велејќи дека конфликтите „можеби фатално“ го поткопале авторитетот на Советот.

Фото: ЕПА

Објавено на

часот

Сподели

Гутереш, говорејќи на отворањето на Советот за човекови права на ОН во Женева, рече дека Советот за безбедност често се наоѓал во слепа улица и „не можел да одговори на најважните мировни и безбедносни прашања на нашето време“.

„Недостатокот на единство на Советот во врска со руската инвазија на Украина и израелските воени операции во Газа по ужасните терористички напади на Хамас на 7 октомври сериозно, можеби фатално, го поткопаа неговиот авторитет“, рече тој.

„На Советот му е потребна сериозна реформа на составот и работните методи“, додаде тој.

Минатата недела, Соединетите Држави ставија вето на нацрт-резолуцијата на Советот за безбедност со која се повикува на итен хуманитарен прекин на огнот во израелската офанзива во Газа.

Тоа беше трето американско вето на нацрт-резолуцијата од почетокот на актуелниот конфликт на 7 октомври.

Околу 1,5 милиони жители на Газа се сместени во шатори и други привремени засолништа во градот Рафа на границата со Египет, повеќето од нив ги напуштиле своите домови на северот на земјата бегајќи од израелската офанзива.

Гутереш, кој го опиша Рафа како центар за хуманитарни операции во палестинската енклава, рече дека израелски напад на тој град во полн обем ќе има катастрофални последици.

„Целосна израелска офанзива врз градот не само што би била застрашувачка за повеќе од милион палестински цивили кои се засолнија таму, туку ќе го стави последниот клинец во ковчегот на нашите програми за помош“, рече тој.

ТОП ВЕСТИ

ПОСЛЕДНИ ВЕСТИ