Пјонгјанг оттогаш изгради стотици километри нови или подобрени огради, ѕидови и стражарници, покажуваат сателитски снимки. Со ова режимот дополнително го запре протокот на информации, стоки и странски елементи во земјата, пишува Ројтерс. Агенцијата и Институтот Мидлбери проучувале сателитски снимки од северната граница на Северна Кореја, снимени помеѓу 2019 и почетокот на 2023 година.
Поради нецелосната слика, географските и временските услови, не беа достапни сите 1,4 илјади километри од границата со Кина и 18 километри со Русија. Но новата безбедносна инфраструктура може да се види на најмалку 489 километри од границата. Таа вклучува бодликава жица, бетонски ѕидови, двојни огради и дополнителни стражарници.
Тие што пребегнуваат, активистите за човекови права и извори во Кина вклучени во шверцот на луѓе и стоки велат дека новите бариери ги задушуваат рутите што биле економски спас за ранливите групи, ги прекинуваат патиштата за бегство од авторитарниот режим и дополнително го ограничуваат пристапот до надворешни информации. Северна Кореја им нареди на чуварите да пукаат во секој што се обидува да избега, без предупредување, според официјалните документи објавени од кинеските власти во 2020 година, предупредувајќи ги жителите на ризиците.
Во декември, американското Министерство за финансии ја санкционираше главната канцеларија на севернокорејската гранична контрола поради кршење на човековите права, вклучително и поставување нагазни мини и пукање во тие што пребегнуваат.
„Традиционалната рута меѓу Северна Кореја и Кина сега е практично готова, освен ако ситуацијата не се промени“, рече Ким, јужнокорејски свештеник што им помагал на северњаците во бегството. Тој и другите што оперираат на границата зборуваа под услов на делумна или целосна анонимност, наведувајќи го стравот за нивната безбедност и желбата да ги заштитат своите мрежи.
Само 67 луѓе побегнале во Јужна Кореја минатата година, во споредба со 1.047 во 2019 година, покажуваат официјалните податоци. Бројот паѓаше и пред пандемијата поради посилните контроли во Кина, претпочитаната дестинација на тие што пребегнуваат.
Севернокорејската влада и државните медиуми не говорат ништо во врска со изградбата на границата, а амбасадата во Лондон не одговори на повиците на Ројтерс. Но официјалните тела на земјата зборуваат за зголемена безбедност за коронавирусот и другите „надворешни работи“ да не влезат во земјата.
Во говорот во кој прогласува победа против вирусот, Ким Џонг Ун им нареди на официјалните лица да „обезбедат совршенство“ на повеќекратната блокада на „границата, првата црта, на крајбрежните области, на море и во воздух“.
