Големите напади, започнати од американскиот претседател Доналд Трамп минатата недела, беа насочени кон Хутите кои се поврзани со Иран поради нивните напади врз бродови во Црвеното Море. Министерството за здравство со кое раководат Хутите соопшти дека најмалку 53 лица, меѓу кои жени и деца, биле убиени во нападите.
Севернокорејскиот амбасадор Ма Донг Хуи, според извештајот на државната новинска агенција КЦНА, изјавил дека Вашингтон неселективно гаѓал цивили и имот користејќи воздушни и поморски сили, вклучително и носач на авиони.
„Воениот напад на САД претставува насилно кршење на Повелбата на ОН и меѓународното право и е јасно кршење на територијалниот суверенитет на друга земја, што не може да се оправда на кој било начин“, рече Ма.
„Изразувам длабока загриженост за незаконските и непромислени воени дејствија на Соединетите Држави, кои се опседнати со постигнување геополитички амбиции и силно ги осудувам и отфрлам“, додаде тој.
Министерството за одбрана на САД соопшти дека во нападите се погодени повеќе од 30 цели и вклучувале борбени авиони кои полетале од носач на авиони во Црвеното Море.
