четврток, 18 април 2024

Сестрата на Ким Џонг Ун: Јапонскиот премиер побара средба со севернокорејскиот лидер

Северна Кореја соопшти дека јапонскиот премиер Фумио Кишида предложил средба со севернокорејскиот лидер Ким Џонг Ун, додека Северна Кореја ја повика Јапонија да покаже искреност во подобрувањето на билатералните односи и да ја одржи првата средба меѓу лидерите на нивните земји по околу 20 години.

Фото: ЕПА

Објавено на

часот

Сподели

Јапонската влада не одговори веднаш на севернокорејското соопштение. Во изјавата што ја пренесоа државните медиуми, Ким Јо Јонг, сестрата на Ким и висок функционер, вели дека Кишида користел неодреден канал за да го пренесе својот став дека сака да се сретне лично со Ким Џонг Ун што е можно поскоро, пишува АП.

Ким Јо Јонг рече дека нема да има напредок во односите меѓу Северна Кореја и Јапонија се додека владата на Кишида го покренува прашањето за јапонските државјани киднапирани во Северна Кореја во изминатите децении и се спротивставува на она што таа го опиша како „користењето на суверените права“ од страна на Северна Кореја, осврнувајќи се на севернокорејските активности за тестирање на оружје.

„Ако Јапонија продолжи со обидите да го попречи остварувањето на нашите суверени права и продолжи да биде преокупирана со прашањето за киднапирањата, кое нема што да се реши или истражи, тогаш понудата на премиерот за разговори неизбежно ќе биде означена како ништо повеќе од обид да ја подобри својата популарност“, рече таа.

„Се додека Јапонија е непријателски расположена кон Северна Кореја и ги крши нашите суверени права, ќе ја сметаме за непријател кој е во рамки на нашата мета, а не за пријател“, рече Ким Јо Јонг. „Премиерот треба да знае дека нема да може да се сретне со раководството на нашата земја само затоа што тоа го сака или само затоа што така е решен“.

Во февруари, Ким Јо Јонг издаде слична изјава за билатералните врски, велејќи дека Северна Кореја е отворена за подобрување на односите со Јапонија, па дури и го покани Кишида во Пјонгјанг. Но, таа рече дека тоа ќе биде можно само ако Токио „се откаже од својата лоша навика неразумно да ја прозива Северна Кореја за своето легитимно право на самоодбрана и не поставува пречка каква што е веќе решеното прашање со киднапирањето“.

Кишида претходно изјави дека верува оти средбата со Ким Џонг Ун е важна на различни начини, вклучително и решавање на прашањето со киднапираните јапонски граѓани. Јапонските медиуми објавија дека тој рекол дека не бил запознаен со соопштението на Северна Кореја кога го прашале за тоа во парламентот во понеделникот.

Некои експерти велат дека Северна Кореја се стреми да ги подобри врските со Јапонија како начин да го ослабне трилатералното безбедносно партнерство Токио-Сеул-Вашингтон, додека Кишида исто така сака подобри врски со Северна Кореја за да ја зголеми својата популарност во Јапонија која е во пад.

САД и Јужна Кореја ги прошируваат своите воени вежби и трилатерални вежби во кои учествува Јапонија како одговор на севернокорејските провокативни тестови на оружје од 2022 година. Севернокорејското оружје тестирано во последниве години вклучува проектили со нуклеарно оружје дизајнирано да погоди клучни објекти во Јапонија, како и во Јужна Кореја и на копнениот дел на САД.

Северна Кореја и Јапонија немаат дипломатски врски, а нивните односи се во сенка на севернокорејската нуклеарна програма, минатото киднапирање на јапонски граѓани од страна на Северна Кореја и јапонската колонизација на Корејскиот полуостров во 1910-1945 година.

По долгогодишно негирање, Северна Кореја на состанокот во 2002 година меѓу Ким Џонг Ил, покојниот татко на Ким Џонг Ун, и тогашниот јапонски премиер Јуничиро Коизуми призна дека нејзини агенти киднапирале 13 Јапонци, главно за да обучуваат шпиони на јапонски јазик и култура.

На петмина од киднапираните им било дозволено да се вратат во Јапонија таа година, а за другите кажале дека починале. Јапонија мисли дека барем некои од нив можеби сè уште се живи и верува дека стотици други можеби се киднапирани. Севернокорејските државни медиуми, исто така, денеска објавија дека Ким Џонг Ун надгледувал вежба со тенкови и ги охрабрил своите оклопни сили да ги засилат воените подготовки во светло на зголемените тензии со Јужна Кореја.

ТОП ВЕСТИ

ПОСЛЕДНИ ВЕСТИ