На влегување во собраниската зграда Села изјави дека секако, парламентарното мнозинство има гласови за разрешување на министрите Азир Алиу и Фатмир Меџити и за именување на нови министри од редовите на неговата партија.
Тој нагласи дека се работи партиски и инститцуионално, врз база на одлуки на Кадровската комисија и на Управниот совет на АА, за разлика од, како што рече, групацијата на Таравари која се собра неформално во Куманово.
„Централното собрание со одлука и печат е закажано са сабота. Одлуките ќе бидат легитимни и според статутот. Но, зачудувачки е во една демократија, лидер на партија, (Таравари,н.з.) да формира партиска фракција и исто така да организира неформални собири“, рече Села и додаде дека Таравари почнал да дејствува криминално и врз основа на лични интереси.
Координаторот на пратеничката група на АА, Аднан Незири, оментирајќи го вчерашниот собир на Алијансата за Албанците во Куманово свикана од претседателот Арбен Таравари, нагласи дека тој собир не бил легитимен врз основа на Статутот на партијата. Потенцира дека од информациите кои ги поседуваат на вчерашниот состанок имало помалку од 40 членови, а не 75 членови како што кажаа вчера на состанокот.
„Тие не се реални, затоа што и и тој настан не беше Собрание, зашто се знае врз основа на Статутот тоа може да го свика претседателот на Собранието на партијата и има рок од седум дена. Легално Собрание на Алијансата за Албанците ќе биде тоа свикано за в сабота во 13 часот во Скопје. Тоа е легално и процедурално врз основа на Статутот и правните процедури“, рече тој.
Незири нагласи дека партијата не е поделена, туку претседателот на партијата е поделен од партијата, затоа што, како што рече, неговата комуникација не била врз основа на процедурите и правилата што се бараат во партијата.
„Не се зборува за печат, тоа е техничка работа. Партијата има органи и органите не беа почитувани, затоа што комуникација врз основа на статус на Фејсбук не е реална комуникација и комуникација што треба да се реализира врз основа на Статут и други обврски што ги има претседателот на партијата. Во Централното претседателство имаше една одлука од партијата за која требаше тој да контактира и со Централното претседателство и врз основа на тие реални потребни реални процедури се носат некои работи, а не преку Фејсбук. Партијата не комуницира со Фејсбук статус. Има органи, тоа е колективна одлука, заради тоа и постојат органите на партијата – Централното претседателство и другите органи“, рече тој.
Според Незири, нема да има две Алијанси, заради тоа што, како што рече, ќе има Централно претседателство легално и на тоа ќе се одлучува дека има само една Алијанса, а грешката што ја направил претседателот е обврска на тој што треба да дава одговорност, односно отчет.
На новинарско прашање дали на утрешното Собрание ќе бараат од Таравари да даде оставка, Незири рече тој треба да присуствува како член на партиското собрание и да даде отчет. Ако не дојде утре, рече тој, тоа ќе биде на негова одговорност и посочи дека тој има обврска да присуствува оти е член на Собранието на партијата.
Крилото на Таравари вчера одржа, како што тој претходно најави консултативен состанок на Централното собрание во Куманово. По завршувањето на состанокот Блерант Рамадани изјави дека 75 претставници на партиското тело му дале поддршка на Таравари за коалиција со албанската опозиција.
„ Како што и вие бевте сведоци сега се реализираше состанок со претставници на централното собрание каде беа присутни 75 претставници на централното собрание и сите едногласно гласаа и потпишаа исто така за да му дадат целосна поддршка на претседателот да ја реализира оваа коалиција со албанската опозиција, сѐ со цел еднаш после 20 години ДУИ да помине во опозиција“, рече Рамадани.
Во изјавата Рамадани потсети на иницијативата иницирана од претставници на централното собрание каде преку декларација му се дава поддршка на претседателот Таравари за коалиција со албанските политички партии, со цел како што рече, ДУИ да биде опозиција. Втората точка од декларацијата, додаде, е давање поддршка на претседателот, партијата после изборите да биде проевропска и во насока на политиките на САД.
