Шефот на градската управа на Којева, Роман Попко, изјави дека најмалку едно лице загинало, додека градоначалникот Виталиј Кличко изјави дека се ранети девет лица, меѓу кои и едно 13-годишно момче.
Во Харков, вториот по големина град во Украина, две лица загинаа, а најмалку 11 се ранети, изјави регионалниот гувернер Олех Синегубов.
Уништен е дел од повеќекатна станбена зграда, каде што непознат број луѓе останале заробени, изјави градоначалникот на Харков, Ихор Терехов.
Во руските баражни напади се користат голем број ракети и беспилотни летала во обид да ја задушат воздушната одбрана на Украина.
Според официјални лица во Киев, меѓу 29 декември и 2 јануари биле испукани повеќе од 500 беспилотни летала и проектили, а со ова се исцрпуваат резервите на оружје на Украина.
Ракетните напади уследија по вчерашната посета на полскиот премиер Доналд Туск во Украина, кога тој вети дека ќе продолжи да ја поддржува против руската инвазија и најави нов пакет воена помош, кој вклучува заем за купување оружје и ветување дека ќе најде начини за заедничко производство на тоа оружје.
Сојузниците на Украина се обидуваат да ја уверат дека се посветени на долгорочната одбрана на земјата, каде што се загрижени дека поддршката од Западот слабее. Британскиот премиер Риши Сунак и новиот француски министер за надворешни работи Стефан Сезурне го посетија Киев во новата 2024 година со оваа цел.
