Велат дека патот до срцето води преку стомакот.
За оваа прастара мудрост се свесни дипломатите и политичките лидери кога пречекуваат ценети гости во своите земји и резиденции. Раскошниот оброк може да доведе до „подмачкување“ на затегнати билатерални односи, што особено добро го знаат во Елисејската палата.
Меѓутоа, организирањето дипломатска вечера воопшто не е едноставно. Особено кога се во прашање „меѓународните“ непца.
Политико издвојува шест ситуации во кои понудата на чиниите довела до меѓународен инцидент.
Руска салата на самитот на НАТО
На самитот на НАТО во Мадрид во 2022 година – кој се одржа непосредно по почетокот на руската инвазија на Украина – едно јадење на менито предизвика врева.
За ручек, Шпанците служеа „Енсаладила руса“, или „руска салата“.
Јадењето, кое се состои од студени компири, тврдо варени јајца, грашок, моркови и мајонез е популарно во Шпанија, исто како и во Источна и Југоисточна Европа, во различни варијации.
Со оглед на клучната точка на агендата– поддршката за одбранбениот сојуз против Украина, наспроти руската агресија – одлуката за оброкот кренал многу веѓи на самитот.
Без оглед, јадењето наводно било изедено за неколку часа, а следниот ден на менито било наведено како „традиционална салата“.
Многу ресторани низ Шпанија оттогаш го преименуваа јадењето во знак на солидарност со Украина.
Британската храна не е за Жак Ширак
Поранешниот француски претседател Жак Ширак јасно стави до знаење дека не ја сака британската гастрономија.
„Не можете да им верувате на луѓе што готват толку лошо. По Финска, тоа е земјата со најлоша храна“, рече Ширак на состанокот во Русија во 2005 година, додавајќи дека единственото нешто што Британците некогаш му го дале на европското земјоделство е кравјото лудило.
Сепак, за време на француско-британскиот самит во 2019 година, Ширак го омекна својот став.
„Англиската кујна – во почетокот мислите дека е лоша, а потоа ви станува жал што не е“, рече тој за време на вечерата на која Тони Блер ги фалеше британските деликатеси.
Финците го возвраќаат ударот
Финците не добиваат многу комплименти за нивните рецепти, но не им недостасува смисла за хумор на оваа тема.
Откако поранешниот италијански премиер Силвио Берлускони ја навреди финската кујна велејќи дека Финците „јадат само чадени ирваси“, финскиот синџир на пици „Котипица“ создаде „Берлускони-пица“ прелиена со црвен кромид, печурки и… чадено месо од ирвас.
View this post on Instagram
Пицата на Берлускони на крај ги надмина оригиналните италијански рецепти на меѓународен натпревар за пица во Њујорк.
Слатката одмазда дојде по долготрајната битка за тоа каде ќе биде лоцирано седиштето на Европската агенција за безбедност на храна, што кулминираше со несогласувања меѓу Финска и Италија. Агенцијата конечно доби постојан дом во Парма, Италија.
Пицата Берлускони – откако беше преименувана во „поро“ (што на фински значи „ирваси“) – до ден-денес останува на менито на синџирот за брза храна.
Џорџ Буш и сировата риба
Дали некогаш ви се приповраќало во најлошиот можен момент? На бившиот американски претседател Џорџ Х.В. Буш да.
Во 1992 година Буш се онесвести и повраќаше во скутот на поранешниот јапонски премиер Киичи Мијазава меѓу второто и третото јадење на државната вечера во резиденцијата на премиерот, на која присуствуваа 135 дипломати.
„Само оттркалајте ме под масата додека не заврши вечерата“, му рекол Буш на својот лекар, кој бил присутен.
Јапонците брзо измислија нов сленг-збор, „бушусуру“, што значи „да се направи Бушовата работа“, односно да се поврати.
Франсоа Оланд и неговото вино
Поранешниот француски претседател Франсоа Оланд, голем ентузијаст за вино, го откажа планираниот ручек со иранскиот претседател Хасан Рухани во Париз во 2016 година, откако овој побара да не се служи вино.
Иранските власти инсистираа на халал-месо и оброк без вино, според верските обичаи во Иран, каде што алкохолот е забранет.
Сепак, виното е столб на француската култура, а француските власти одбија да се откажат од него.
Наместо тоа, Елисејската палата предложи безалкохолен појадок, што Иранците го отфрлија како „премногу евтина опција“.
Лула си отиде дома гладен
Бразилскиот претседател Луис Инасио Лула да Силва го критикуваше квалитетот и големината на порциите што му беа послужени минатата година за време на неговите посети на двете светски кулинарски престолнини: Париз и Рим.
Лула рече не ужива во храната на официјалните државни вечери бидејќи „сѐ е ситно и ограничено“.
„Нема голем послужавник од кој можеш да избереш и да го добиеш она што го сакаш. Тоа што го јадеш е малку – искрено, јас не можам да се навикнам на ова. Мени требаат количества. Можеби тоа е ненаситност од моја страна, но јас сакам квантитет“, изјави Лула.
