Русија испрати 447 кози во севернокорејскиот град Расон, потврди руската агенција за безбедност на земјоделството Роселхознадзор во соопштение за печатот. Козите, кои пристигнаа од регионот на Ленинград, ја претставуваат првата серија животни што Русија има намера да ѝ ги испорача на Северна Кореја.
Козите ќе обезбедуваат млечни производи за локалните деца, што би требало да го ублажат недостигот на храна во Северна Кореја, што во голема мера е предизвикан од владините политики. Ситуацијата со недостиг дополнително се влоши за време на пандемијата на коронавирус, пишува Политико.
Според Хјуман рајтс воч, 10,7 милиони од 25,9 милиони луѓе во Северна Кореја се неухранети, а 18 отсто од децата имаат застој во растот поради хронична неухранетост.
Русија со години е наклонета кон Северна Кореја, особено од почетокот на сеопфатната инвазија на Украина во февруари 2022 година. Пјонгјанг отворено ја поддржува руската инвазија, а е обвинет и за испорака на оружје што им помага на руските сили на бојното поле.
И Русија и Северна Кореја во минатото ги негираа тврдењата дека Пјонгјанг испорачува оружје или муниција на силите на Кремљ.
За време на неодамнешното патување на Путин во Северна Кореја, двајцата лидери потпишаа договор со кој се обврзаа на „взаемна помош во случај некој да ги нападне“. Договорот е дел од сеопфатниот договор кој опфаќа сè, од образование до земјоделство и туризам.
