Рускиот претседател Владимир Путин во четвртокот изјави дека во принцип го поддржува предлогот на Вашингтон за 30-дневен прекин на огнот со Украина, но дека неговите сили ќе се борат додека не се разработат неколку клучни услови.
Оттогаш двете страни разменија тешки воздушни напади, а Русија се приближи на бојното поле до протерување на украинските сили од нивното повеќемесечно упориште во западниот руски регион Курск.
Рано утринава три лица се повредени, меѓу кои и едно седумгодишно дете, во напад на украинско беспилотно летало на рускиот пограничен регион Белгород, објави регионалниот гувернер Вјачеслав Гладков на апликацијата за пораки Телеграм.
„Двајца од нив се повредени откако беспилотно летало удрило во нивната куќа, предизвикувајќи пожар во областа Губкин во регионот, додека уште едно лице е повредено во напад со беспилотно летало на селото Долгоје“, изјави Гладков.
Александар Гусев, гувернер на југозападната руска област Воронеж, напиша на Телеграм дека единиците за противвоздушна одбрана уништиле повеќе од 15 украински беспилотни летала над регионот. Засега нема информации за повредени или материјална штета, рече Гусев.
Вршителот на должноста гувернер на јужниот руски регион Ростов изјави дека одбранбените единици одбиле напад со беспилотни летала врз регионот во текот на ноќта, без извештаи за повредени или материјална штета.
Во Украина, властите известија за неколку напади со руски беспилотни летала, вклучително и во северниот регион Чернихив, каде што пожарникарите се бореа со пожар што беше предизвикан од напад со руски беспилотни летала, соопшти украинската служба за вонредни состојби.
Украинските медиуми објавија серија експлозии во регионот околу главниот град Киев, откако украинските воздухопловни сили објавија предупредувања за закана од напади со беспилотни летала врз Киев и голем број други централни украински региони.
