вторник, 18 јуни 2024

Ројтерс: Путин е подготвен да ја запре војната во Украина

Рускиот претседател Владимир Путин е подготвен да стави крај на војната во Украина и да се согласи на прекин на огнот на постоечките борбени линии, но ќе продолжи да се бори доколку Киев и Западот не го прифатат тоа, изјавија четири руски извори за Ројтерс.

Фото: ЕПА

Објавено на

часот

Сподели

Тројца извори запознаени со разговорите во опкружувањето на Путин рекоа дека тој е фрустриран што украинскиот претседател Володимир Зеленски и западните земји не се согласуваат на преговори.

„Путин може да се бори онолку долго колку што е потребно, но тој е подготвен и за прекин на огнот – замрзнување на војната“, изјави висок руски извор кој соработувал со Путин и има познавање за разговорите на највисоките нивоа во Кремљ. Тој, како и другите извори, зборуваше под услов на анонимност поради чувствителноста на темата.

За овој извештај, Ројтерс разговарал со вкупно пет лица кои работат или работеле со Путин на високо ниво во политичкиот и деловниот свет. Петтиот извор не го коментираше замрзнувањето на војната на сегашните линии на фронтот.

Портпаролот на Путин Дмитриј Песков како одговор на барањето за коментар, рече дека шефот на Кремљ во повеќе наврати јасно ставал до знаење дека Русија е отворена за дијалог за да ги постигне своите цели, велејќи дека земјата не сака „вечна војна“. Украинските министерства за надворешни работи и одбрана не одговорија на прашањата.

Назначувањето на економистот Андреј Белоусов за министер за одбрана на Русија минатата недела, според некои западни воени и политички аналитичари, ја подготвува руската економија за долготрајна војна.

Но, изворите велат дека Путин, реизбран во март за нов шестгодишен мандат, претпочита да го искористи моменталниот моментум на Русија за да стави крај на војната. Не го коментираа директно новиот министер за одбрана. Врз основа на нивните сознанија за дискусиите во највисоките кругови на Кремљ, двајцата извори рекоа дека Путин верува дека досегашните успеси од војната се доволни за да се објави победа на рускиот народ.

Тројца извори рекоа дека Путин разбира дека за секој понатамошен напредок ќе биде потребна друга мобилизација, која тој не ја сака.

Можноста за прекин на огнот, па дури и за мировни преговори се чини далечна во моментов, пишува Ројтерс. Зеленски во неколку наврати изјави дека мир под условите на Путин не доаѓа предвид. Тој вети дека ќе ја врати изгубената територија, вклучувајќи го и Крим, кој Русија го анектираше во 2014 година. Тој потпиша декрет во 2022 година со кој формално ги прогласи преговорите со Путин за невозможни.

Еден извор предвидува дека не може да се постигне договор додека Зеленски е на власт, освен ако Русија не го заобиколи и не постигне договор со Вашингтон. Сепак, американскиот државен секретар Антони Блинкен, говорејќи во Киев минатата недела, им рече на новинарите дека не верува дека Путин е заинтересиран за сериозни преговори.

Украина се подготвува за разговори на кои домаќин ќе биде Швајцарија следниот месец, со цел да се обедини меѓународното мислење за тоа како да се стави крај на војната. Разговорите се свикани на иницијатива на Зеленски, кој рече дека Путин не треба да присуствува. Швајцарија не ја покани Русија.

Москва изјави дека преговорите не се веродостојни без нејзино присуство. Украина и Швајцарија сакаат да присуствуваат руските сојузници, вклучително и Кина.

Кремљ не го коментира напредокот на, како што ја нарекува, специјалната воена операција во Украина, но во неколку наврати изјави дека Москва е отворена за преговори врз основа на „новата ситуација на теренот“.

Како одговор на прашањата за извештајот на Ројтерс, портпаролот на американскиот Стејт департмент рече дека секоја мировна иницијатива мора да го почитува „територијалниот интегритет на Украина во нејзините меѓународно признати граници“ и ја опиша Русија како единствена пречка за мирот во Украина. „Кремљ сè уште не покажа значаен интерес за завршување на војната, напротив“, рече портпаролот.

Путин би бил подготвен да се задоволи со територијата што ја има сега и да го замрзне конфликтот на сегашните линии на фронтот, изјавија четири извори за Ројтерс. „Путин ќе каже дека победивме, дека НАТО нè нападна и дека го задржавме нашиот суверенитет, дека имаме копнен коридор до Крим, што е точно“, рече еден од нив.

Замрзнувањето на конфликтот по сегашните линии ќе ѝ остави на Русија значителни делови од четири украински региони што формално ги анектираше во септември 2022 година, но без целосна контрола на ниту еден од нив.

Таквиот договор нема да ги исполни целите што Москва ги постави на почетокот на војната, кога рече дека четирите украински региони – Доњецк, Луганск, Запорожје и Херсон – ѝ припаѓаат на Русија во целост. Песков рече дека не може да стане збор за враќање на четирите региони кои, според нив, сега се дел од Русија.

Колку подолго војната се одолговлекува, толку повеќе ветерани се враќаат во Русија, незадоволни од повоените работни места и изгледите за приходи, што потенцијално создава тензии во општеството, рече еден од изворите блиски до Путин.

Руските сили контролираат околу 18% од Украина и овој месец напредуваа во североисточниот регион Харков. „Русија ќе притиска понатаму“, вели извор кој соработувал со Путин. Путин полека ќе стекнува територија додека Зеленски не изнесе понуда да престане, рече изворот, додавајќи дека рускиот лидер им изразил мислење на своите помошници дека Западот нема да обезбеди доволно оружје.

ТОП ВЕСТИ

ПОСЛЕДНИ ВЕСТИ