Снабдувањето со околу 400 проектили вклучува многу балистички ракети со краток дострел од класата „фатех-110“, како „золфагхар“, кажале три ирански извори. Оваа мобилна ракета може да погоди цели на оддалеченост меѓу 300 и 700 километри.
Иранското министерство за одбрана и Револуционерната гарда, елитната сила која ја надгледува иранската програма за балистички проектили, одбиле да коментираат. Руското министерство за одбрана исто така не дало коментар.
Испораките почнале на почетокот на јануари откако договорот бил финализиран на состаноци на крајот на минатата година меѓу ирански и руски воени и безбедносни функционери одржани во Техеран и Москва, кажал еден од иранските извори.
Ирански воен извор, кој побарал да остане анонимен поради чувствителноста на информациите, кажал дека имало најмалку четири испораки на проектили и дека ќе има уште во следните недели.
Друг ирански извор кажал дека дел од проектилите биле испратени во Русија со брод преку Касписко Езеро, додека други биле транспортирани со авион.
„Ќе има уште испораки. Нема причина да го криеме тоа. Дозволено ни е да извезуваме оружје во која земја сакаме“, кажал еден од иранските извори.
Ограничувањата на Советот за безбедност на Обединетите нации на иранскиот извоз на некои проектили, дронови и друга технологија истекоа во ноември. Меѓутоа, Соединетите Американски Држави и Европската Унија ги задржаа санкциите на иранската програма за балистички проектили поради извозот на оружје на сојузниците на Техеран на Блискиот Исток и Русија.
