недела, 23 јуни 2024
Во Собранието на Македонија

Реформите и правото главни теми на разговорите на Гаши со Агелер

Амбасадорката на САД, Ангела Агелер денеска го посети претседателот на Собранието, Африм Гаши и, како што е наведено во официјалното соопштение, таа ја реафирмираше спремноста на САД за продлабочување на билатералните односи меѓу двете земји како и очекувањата за продолжување на спроведување на реформите во земјата со цел добро владеење на правото, реформи во правосудскиот систем, како и борба против корупцијата и криминалот.

Објавено на

часот

Сподели

На средбата Агелер и Гаши ги поздравиле долгогодишните и силни билатерални односи меѓу двете држави и била нагласена важноста од одржување и натамошно зајакнување на овие односи кои се од заеднички интерес на двете земји.

Гаши изразил благодарност за континуираната поддршка што САД ја даваат на Македонија и што, како што кажал, високо се цени во земјата. Силен столб во билатералната соработка, стои во информацијата, претставува Декларацијата за стратешко партнерство од 2008 година како и Стратешкиот дијалог меѓу двете влади од 2022 година.

Претседателот Гаши истакнал дека е „многу важна улогата на Република Северна Македонија и Соединетите Американски Држави во промовирање на регионалната стабилност и соработка меѓу земјите од Западниот Балкан. Во тие рамки, тој информирал дека македонското Собрание претседава со Парламентарното собрание на Процесот за соработка во Југоисточна Европа и од 18 до 20 јуни 2024 година во Собранието ќе се одржи 11-та Пленарна сесија на Парламентарното собрание на Процес за соработка во Југоисточна Европа што претставува уште еден знак на посветеност на земјата за продлабочување на регионалната соработка.

Гаши изразил благодарност за континуираната и силна поддршка на Соединетите Американски Држави за напорите на Северна Македонија за евроатланска и европската интеграција, како и за значајната поддршка за унапредување на политичките процеси во земјата.

Амбасадорката Агелер се заблагодарила за средбата и истакнала дека Собранието  е една од најзначајните институции во земјата. Таа искажала задоволство од успешно спроведените претседателски и парламентарни избори во земјата кои биле фер, слободни и демократски.

„Таа ја реафирмираше спремноста на САД за продлабочување на билатералните односи меѓу двете земји како и очекувањата за продолжување на спроведување на реформите во земјата со цел добро владеење на правото, реформи во правосудскиот систем, како и борба против корупцијата и криминалот“, стои во соопштението.

Двајцата соговорници, како што наведуваат од собраниската прес-служба, се согласиле дека во иднина треба поголемо внимание да се посвети на економските прашања со цел подобрување на животниот стандард на сите граѓани, подобрување на образовниот систем како и привлекување на повеќе странски инвестиции со цел државава да може да напредува на својот европски пат и да ги надмине тешките предизвици со кои се соочува.

ТОП ВЕСТИ

ПОСЛЕДНИ ВЕСТИ