Полска одлучи на 19 јули да премести воени единици на исток откако борците на Вагнер почнаа да обучуваат белоруски специјални сили неколку километри од нејзината граница. Два дена подоцна, рускиот претседател Владимир Путин ја обвини Полска за територијални амбиции во поранешниот Советски Сојуз, и кажа дека агресија против Белорусија би се сметала за напад на Русија.
„Ако дојде до сериозни инциденти со Вагнер групата на границите на членките на НАТО и ЕУ, како Полска, Литванија и Летонија, несомнено заедно ќе преземеме акција“, кажа полскиот министер Мариуш Камински.
„Не исклучувам дека, ако заклучиме дека тоа е вистинскиот одговор, целосно ќе ја изолираме Белорусија“.
Полска, која негира какви било територијални амбиции во Белорусија, е важно засолниште за опонентите на белорускиот претседател Александар Лукашенко, а Варшава стана еден од најсилните поддржувачи на Киев од почетокот на руската инвазија.
Патниот сообраќај меѓу Полска и Белорусија е значително намален од февруари поради влошувањето на односите меѓу двете земји.
Полска ја обвини Белорусија дека вештачки создава мигрантска криза на границата доведувајќи луѓе од Блискиот Исток и Африка и обидувајќи се да ги префрли преку границата. Белорусија тоа повеќе пати го демантираше.
