Од текстилните фабрики во Индија до лабораториите во САД, луѓето со камери на главите станаа учители на идните роботи.
Луѓето како учители на машините
Во индискиот град Карур, работникот Навин Кумар внимателно ги витка крпите секој ден додека камерата го снима секое негово движење. Овие снимки не завршуваат на социјалните медиуми, туку во базите на податоци на Обџектвејс, компанија која обучува системи со вештачка интелигенција да разбираат физички движења.
Секоја грешка, секое превиткување на ткаенината станува дел од огромна архива со која роботите учат како да ги користат рацете, да препознаваат предмети и да проценат сила потребна за задачата.
Податоците собрани од ваквите фирми се користат во истражувања за компании како Тесла, Бостон Дајнамикс, Гугл, Нвидија и ОпенАИ, кои сакаат да создадат роботи способни за реалниот свет, а не само за виртуелни модели.
Нов глобален експеримент со роботи
Роботите сега учат врз основа на „прво лице“ на луѓето кои носат паметни очила додека готват, редат облека или чистат. Компании како Микро1 и Фигур АИ плаќаат луѓе во Бразил, Индија и САД да ги снимаат своите секојдневни активности. Истовремено, во источна Европа се создаваат таканаречени „фарми на раце“, каде операторите со помош на далечински џојстик управуваат со роботите и го бележат секое нивно движење.
Иако критичарите предупредуваат дека овие системи сè уште се борат да функционираат независно, пазарот за хуманоидни роботи се проценува дека вреди дури 38 милијарди долари во следната деценија. Вработените во компаниите што работат на обука на роботи со вештачка интелигенција веруваат дека е само прашање на време кога „машините ќе научат да прават сè што правиме ние“.
