Во дом за стари лица во градот Марсен, мали кутии со интегрирана вештачка интелигенција регистрираат сомнителни звуци или повици од корисници и ги пренесуваат до персоналот, со прецизни информации за тоа од која соба дошол повикот, објави швајцарскиот портал Ртс инфо.
„На тој начин можам да ги информирам моите колеги, и самата да одам во собата за да видам што се случува“, објасни Мелина Валаје, медицинска сестра која работи во овој дом.
Уредот е развиен во Франција и може да препознае и регистрира околу 100 различни ситуации, од кои околу петнаесет бараат интервенција од персоналот, како на пример кога корисникот бара помош или се слушаат сомнителни звуци.
Шефот на персоналот на домот за стари лица, Марио Маседо, вели дека уредот го променил начинот на кој се грижат за старите лица и дека е добро да се има таква алатка што обезбедува дополнителна безбедност. Жил Дебин, коосновач на ОСО-ВИ, која го произведе уредот, рече дека е подобро вештачката интелигенција да испраќа премногу предупредувања отколку да пропушти сериозна ситуација.
Уредот веќе се користи во повеќе од сто домови за стари лица во Швајцарија, Франција, Скандинавија и Јапонија.
