Вилијамс, која постави повеќе рекорди во вселенските летови откако се приклучи на агенцијата во 1998 година, не даде причини или детали во врска со времето на нејзиното пензионирање во соопштението издадено од НАСА, пренесува Си-ен-ен.
„Секој што ме познава знае дека вселената ми е апсолутно омилено место“, изјави Вилијамс.
„Ми беше неверојатна чест да служам во Канцеларијата за астронаути и да имам можност да летам во вселената три пати.“
Вилијамс првпат отпатува на Меѓународната вселенска станица во 2006 година, како дел од мисијата на вселенскиот шатл Дискавери, а се врати во орбитата во 2012 година во руска капсула Сојуз.
Но, нејзината последна мисија, во која таа и нејзиниот колега астронаут од НАСА, Буч Вилмор, тргнаа да ја тестираат новата капсула Старлајнер на Боинг на нејзината прва мисија со екипаж, веројатно е и најпозната.
Вилмор и Вилијамс очекуваа дека за време на пробниот лет ќе поминат околу една недела на вселенската станица. Сепак, двајцата на крајот останаа повеќе од девет месеци поради технички проблеми кои се појавија на патувањето со Старлајнер – поради што НАСА, од безбедносни причини, одлучи леталото да го врати на Земјата без екипаж.
Вилијамс и Вилмор привлекоа меѓународно внимание поради нивното искуство, иако двајцата астронаути често повторуваа дека уживале во времето поминато во орбитата и дека биле добро подготвени за неочекувано продолжување на мисијата.
„Имав неверојатна 27-годишна кариера во НАСА, во голема мера благодарение на целата љубов и поддршка што ја добив од моите колеги“, рече Вилијамс во соопштението.
„Меѓународната вселенска станица, луѓето, инженерството и науката се навистина импресивни и овозможија следни чекори во истражувањето на Месечината и Марс. Се надевам дека темелите што ги поставивме ги направија тие смели чекори барем малку полесни.“
Вилијамс помина вкупно 608 дена во вселената, што е вториот најголем вкупен број денови меѓу астронаутите на НАСА, веднаш зад Пеги Витсон.
Вкупно, таа помина 62 часа „слободно лебдејќи“ во вселената низ девет различни вселенски прошетки, што ја прави најуспешна жена во таа категорија и четврта во светот.
За време на престојот во орбитата, таа оствари и неколку забележителни „првенства“: на пример, во 2012 година таа стана првата личност што заврши триатлон во вселената. Вилијамс возеше велосипед за вежбање, симулираше „пливање“ со справа за кревање тегови и трчаше на лента за трчање додека беше врзана со ремен за да не одлета. Претходно, во 2007 година, таа стана првата личност што истрча маратон во вселената.
