Мапата го покажува влијанието на оваа мистериозна и невидлива супстанца врз формирањето на ѕвездите, галаксиите и планетите, соопшти Универзитетот Дарам. Таа ни кажува повеќе за тоа како темната материја помогнала во привлекувањето на обичната материја во галаксии како нашиот Млечен Пат и планети како Земјата.
Мапата, исто така, дава нови детали за односот помеѓу темната материја и обичната материја од која сме составени ние и сè што гледаме и допираме.
Меѓународен тим научници, предводен од астрономи од Универзитетот Дарам, користел податоци од вселенскиот телескоп Џејмс Веб. Областа опфатена со нивната нова мапа е дел од небото околу 2,5 пати поголем од полната Месечина, во соѕвездието Секстант.
Веб го набљудувал регионот вкупно 255 часа и идентификувал речиси 800.000 галаксии, од кои многу биле откриени за прв пат. Мапата содржи информации за околу десет пати повеќе галаксии отколку што може да се видат со телескопите на Земјата, и двојно повеќе отколку со вселенскиот телескоп Хабл.
Тимот беше во можност подетално да види како темната материја комуницира со остатокот од универзумот преку гравитацијата. Доказите за оваа интеракција лежат во степенот на преклопување помеѓу мапите на темната материја и обичната материја, се вели во соопштението. Набљудувањата на Веб потврдуваат дека ова блиско усогласување не може да биде случајност.
Наместо тоа, астрономите велат дека тоа е резултат на гравитацијата на темната материја што ја влече обичната материја кон себе низ космичката историја – што довело до формирање на универзумот што го гледаме денес.
„Откривајќи ја темната материја со невидена прецизност, нашата мапа покажува како невидливата компонента на универзумот ја структурирала видливата материја до тој степен што овозможила формирање на галаксии, ѕвезди и, на крајот, на самиот живот. Оваа мапа ја открива невидливата, но суштинска улога на темната материја, вистинскиот архитект на универзумот, постепено организирајќи ги структурите што ги гледаме преку нашите телескопи“, изјави д-р Гевин Лерој, професор на Одделот за физика на Универзитетот Дарам.
