Чуден феномен е забележан во океаните низ целиот свет – сините китови речиси замолкнаа. Од бреговите на Калифорнија до Нов Зеланд, научниците забележуваат дека овие животни повеќе не испуштаат толку многу звуци како порано, што многу експерти го сметаат за сериозен индикатор дека се случуваат промени во морските екосистеми, на штета на нивната стабилност.
Сините китови не „пеат“ за забава, туку за да комуницираат, да најдат партнери и да се ориентираат во големите длабочини на океанот.
Според научниците, намалувањето на фреквенцијата или целосното отсуство на вокализација е јасен показател дека овие животни се изложени на стрес и променети услови во нивното живеалиште, пренесува Дејли мејл.
Во текот на изминатите шест години, истражувачите од Институтот Монтереј Беј во Калифорнија откриле дека бројот на песни на китови се намалил за дури 40 проценти. Ова е загрижувачки пад, што поттикна дополнителни истражувања.
За да го добијат одговорот, научниците користеле подводни микрофони поставени на морското дно покрај брегот на Калифорнија. Овие уреди, познати како хидрофони, снимаат длабоки звуци со ниска фреквенција кои човечкото уво не може да ги открие и се неопходни за комуникацијата на китовите.
Со анализа на години на снимки, истражувачите откриле дека намалувањето на вокализациите на сините китови се совпаѓа со почетокот на интензивните морски топлотни бранови што предизвикале значителни промени во океаните.
Еден од најмоќните вакви топлотни бранови беше наречен „Дамка“, голема површина со екстремно топла океанска вода што се појави во 2013 година и се прошири на илјадници километри. Оваа промена на температурата ги уништи залихите на храна за многу морски животни, вклучувајќи ги и ситните ракови со кои главно се хранат сините китови.
Ги имаше толку многу, што рибарските мрежи речиси станаа розеви од нивната густина. Меѓутоа, за време на топлотниот бран нивната популација речиси целосно исчезна. Како резултат на тоа, сините китови, наместо нивната вообичаена вокална комуникација, беа принудени да ја насочат целата своја енергија кон наоѓање храна.
„Тоа е како да се обидувате да пеете додека гладувате“, објаснил научникот Џон Рајан.
Истата тишина е забележана и кај сините китови околу Нов Зеланд, каде што научниците забележале помалку звуци поврзани со хранење и парење помеѓу 2016 и 2018 година.
Кога има помалку храна, китовите не само што пеат помалку, туку и се размножуваат помалку, објаснуваат експертите.
„Сините китови се како чувари на океанот. Тие ни покажуваат како се менуваат океаните и во каква состојба се наоѓаат“, вели истражувачката Дон Барлоу.
Затоа, научниците забележуваат дека оваа тишина на китовите не треба да се игнорира. Ова не е само знак дека китовите „зборуваат“ помалку, туку покажува и дека во целиот морски свет се случуваат големи и сериозни промени.
Главната причина, според нив, се климатските промени, кои ја нарушуваат природната рамнотежа во океаните.
