Истражувањето објавено во „Британски весник за исхрана“ покажа дека комбинацијата од кафе, чај и вода е поврзана со најмал ризик од вкупен морталитет, пренесува Фуд & Вајн.
Истражувачите ги анализирале податоците од ОК Биобанка, масовно истражување засновано на население во кое учествувале повеќе од половина милион луѓе. За истражувањето користеле податоци од повеќе од 182.000 возрасни лица кои пополниле барем еден 24-часовен прашалник за исхрана, детално опишувајќи го своето внесување на храна и пијалаци. Тимот ги следел резултатите во текот на 13 години, вклучувајќи ја смртноста и смртност специфична за причината.
Оптимален сооднос за долговечност
Анализата покажа дека пиењето седум до осум шолји течност дневно – мешавина од кафе, чај и вода – е поврзано со најниска стапка на смртност. Но, истражувачите откриле дека специфичната комбинација носи најголема корист. Најдобрите резултати се постигнуваат кога луѓето консумираат кафе и чај во однос 2:3, што значи околу два дела кафе на три дела чај.
Значително намален ризик од многу болести
Оваа мешавина е поврзана со најмал ризик од смрт од сите причини, како и од специфични болести како што се рак, болести на срцето, респираторни проблеми и проблеми со варењето.
Студијата покажа дека придржувањето кон односот 2:3 довело до најзначителен пад на смртноста од респираторни болести, намалувајќи го ризикот за дури 72 отсто во споредба со другите модели на пиење. Исто така, дошло до драстично намалување на смртноста од болести на органите за варење за 65 отсто, како и намален ризик од смрт од кардиоваскуларни болести и рак.
Предупредувања и ограничувања на студијата
Сепак, истражувачите истакнуваат неколку важни предупредувања. Студијата била опсерваторска и се потпирала на податоци кои учесниците сами ги пријавувале, што значи дека не може да докаже причинска врска, туку само поврзаност. Исто така, е утврдено дека замената на вода со кафе и чај, со само четири пијалаци дневно, не покажала никаква корист.
Покрај тоа, кога вкупниот број на дневни пијалаци надминал девет, замената на обичната вода со повеќе кафе или чај било поврзано со потенцијално поголем ризик од кардиоваскуларна смрт. Сепак, истражувачите се надеваат дека нивното истражување може да послужи како основа за идни студии кои еден ден ќе обезбедат појасни упатства за оптимална хидратација.
