Обидот за контрола на надворешната средина носи краткорочно олеснување, но кога резултатите ќе излезат од контрола, анксиозноста расте уште повеќе.
Колку повеќе енергија трошите обидувајќи се да управувате со надворешните фактори, толку помалку енергија ви останува за регулирање на сопствените емоции. Ова може да влијае на вашата концентрација, ефикасност и целокупна продуктивност.
Морин советува да се направи кратка анализа на тековните проблеми. Една ефикасна техника вклучува цртање три концентрични кругови:
- Внатрешен круг – работи што можеме да ги контролираме: труд, подготовка, став, граници, вештини.
- Среден круг – работи на кои можеме да влијаеме: атмосферата на состанокот, начинот на кој другите нè доживуваат.
- Надворешен круг – работи што не можеме да ги контролираме: одлуките на другите луѓе, економските промени, политиките на компанијата, крајниот резултат.
Експертите препорачуваат вашите пет најголеми тековни грижи да ги сместите во соодветен круг. За ставките во внатрешниот круг треба да се преземе конкретен чекор уште денес, додека грижите во надворешниот круг треба свесно да се „отпуштат“ за енергијата да остане насочена таму каде што може да донесе вистински резултати.
Три прашања што го враќаат фокусот
За да се спречи трошење енергија, Морин предлага да си поставите три клучни прашања во моментот кога проблемот ќе почне да ви ги окупира мислите:
- „Дали се занимавам со проблемот или со решението?“
Наместо да размислуваме за најлошите сценарија, покорисно е да го пренасочиме вниманието кон конкретни чекори што ја зголемуваат веројатноста за успех.
- „Дали треба да ги променам околностите или својот однос кон нив?”
Понекогаш е потребно да се постави граница, да се промени навика или да се прилагоди план.
Во други ситуации, особено кога околностите не се променливи, поважно е да ги регулирате сопствените емоции. Кратка прошетка, свесно дишење или поинаква перспектива за ситуацијата може да го намали стресот и да спречи донесување одлуки под влијание на анксиозност.
Морин нагласува дека многу животни страдања произлегуваат од вложување енергија на погрешно место. Ако се трупаат сметки, медитацијата нема да го реши финансискиот проблем, потребен е план. Ако се чека исходот од медицинско тестирање на блиска личност, дополнителното истражување нема да го промени резултатот, но техниките за смирување можат да го олеснат периодот на чекање.
- „Што направив денес за да станам ментално посилен?“
Резултатите не можат секогаш да се контролираат, но индивидуалниот напредок може.
Морин нагласува дека е корисно секојдневно да се препознае барем една постапка усогласена со менталната сила, како што се поставување граница, вежбање нова вештина или јасно искажување на мислењето во тешка ситуација.
Таков фокус спречува ментална исцрпеност и ја одржува енергијата насочена кон она што навистина е под контрола на поединецот.
