Куклата од 131 сантиметар беше продадена на меѓународна аукција „Џонгли“ во Пекинг.
Аукциската куќа изјави дека сега тоа е најскапата играчка од ваков вид во светот.
Куклите Лабубу се необични ликови на чудовишта создадени пред една деценија од хонгконшкиот уметник Касинг Лунг, а нивната популарност порасна во последниве години откако беа промовирани од бројни познати личности.
Куклите Лабубу, кои ги продава кинеската компанија за играчки Поп Март, обично чинат околу 50 јуани (шест евра).
Аукцијата оваа недела беше целосно посветена на Лабубу. На продажба беа ставени 48 предмети, присуствуваа околу 200 луѓе. Аукциската куќа соопшти дека собрала вкупно 3,37 милиони јуани (околу 400.000 евра).
Фигурините предизвикаа светска возбуда бидејќи Лиса од групата К-поп (корејски поп) Блекпинк, често ги спомнуваше во објавите на социјалните мрежи.
Кадифените играчки станаа тренд на ТикТок откако беа спомнати од други познати личности, како што се пејачките Ријана и Дуа Липа.
Поранешниот капитен на Англија, Дејвид Бекам, исто така на Инстаграм објави фотографија од Лабубу закачена на неговата чанта.
На почетокот на оваа година, Поп Март ги повлече куклите од сите продавници во Велика Британија по извештаите дека клиентите се тепале поради нив, па дури и се впуштале во физички пресметки.
Кинескиот производител Поп Март често продава колекционерски играчки во мистериозни „слепи кутии“. Овие предмети се популарни кај купувачите кои откриваат како изгледа куклата што ја нарачале дури кога ќе го отворат пакувањето.
Популарноста на играчките Лабубу придонесе за успехот на Поп Март. Приходите на компанијата во 2024 година изнесуваа 13 милиони јуани, што е двојно повеќе од претходната година.
