Саундра Далтон-Смит, докторка по медицина, објаснува дека постојат седум основни видови одмор неопходни за решавање на „дефицитот на одмор“ кој го зафаќа западниот свет, наведува Американската психолошка асоцијација.
Физички одмор
Физичкиот одмор е токму она што го нарекуваме – обновување на телесната енергија. Тоа може да значи да му дадете приоритет на сонот или на дремката кога ви е потребна. Но физичкиот одмор, вели Стронгин, не значи секогаш мирување – можеби ќе се одлучите за масажа или истегнување наместо напорен тренинг.
Ментален одмор
Кога вашиот мозок е активен подолго време, може да почнете да се чувствувате ментално исцрпено.
Менталниот одмор значи пронаоѓање начини да ги стивнете мислите и да му дадете на мозокот можност да се „наполни“. Тоа може да значи пауза од ментално напорни задачи или замена на исцрпувачки активности со поедноставни, како што се средување алишта или решавање сложувалка.
Емоционален одмор
Емоционалната работа исто така може да биде исцрпувачка. Емоционалниот одмор, вели Стронгин, подразбира пронаоѓање практични начини автентично да ги изразувате своите чувства, ослободувајќи се од исцрпувачкиот притисок постојано „сè да држите под контрола“.
Тоа може да значи да ги обработувате емоциите со пријател или терапевт, наместо да ги потиснувате, или да кажете „не“ на емоционално напорни активности.
Исто така, можете да поставите граници со емоционално исцрпувачки луѓе и улоги или да се дистанцирате од стресни барања и разговори.
Социјален одмор
Социјалниот одмор не им е потребен само на интровертните луѓе. Да се биде опкружен со луѓе цело време значи постојано да се биде „активен“, што може да биде исцрпувачки за секого. Социјалната пауза може да значи помалку обврски во текот на неделата или повеќе време поминато сами.
Сензорен одмор
Светот може да биде бучен, а постојаната изложеност на технологија само ја засилува таа бучава и може да ги преоптовари сетилата.
„Обидете се повремено да направите пауза од сè на што се потпирате преку сетилата – без разлика дали станува збор за позадинска бучава во околината или за екрани што ги заморуваат очите“, изјави Натали Датило-Рајан, докторка по психологија и предавач на Медицинскиот факултет на Универзитетот Харвард.
Креативен одмор
Ако имате работа што бара креативност, осмислување идеи или решавање проблеми, можеби ви е потребен креативен одмор.
Освен што повремено ќе му дадете на вашиот мозок пауза од тие барања, пронајдете начини да се занимавате со креативни хобија – како плетење, пишување, печење или сликање – за задоволство.
Сантос вели дека активностите кои предизвикуваат чувство на восхит и стравопочит, како посета на уметнички музеј или уживање во погледот на езеро или океан, исто така можат да ги обноват креативните резерви.
Духовен одмор
Духовниот одмор може да значи приближување кон она што ви делува исцелувачки, вели Сантос – полнење на „резервоарот“ преку поврзување со цел што ви е смислена или едноставно одвојување време за уживање во убавината на природата.
Промена на начинот на размислување за одморот
Ако чувствувате отпор кон одморот, може да биде корисно целосно да го преобликувате начинот на кој размислувате за него. Наместо да го гледате како пасивен чин што го попречува напредокот или продуктивноста, гледајте на одморот како на вложување во вашата енергија.
„Јас ја гледам енергијата како банкарска сметка. Кога сте зафатени, само повлекувате средства и инвестирате малку. Кога одмарате, градите разновидно инвестициско портфолио“, вели Датило-Раџан.
Сите тие советуваат – начинот на кој се опуштате треба да биде уникатен како што сте и вие.
„Сите се разликуваме по капацитети и потреби, но и од ден на ден. Станува збор за тоа редовно да се запрашате: Како сум и што ми е потребно во овој момент?“
