Тоа е рецепт што можете да го тестирате сами – иако времево не е баш идеално за експерименти со храната поради скапотијата во супермаркетите.
Совршеното варено јајце, велат научниците, има кадифеста жолчка во комбинација со мека, цврста белка.
Постигнувањето на оваа рамнотежа може да биде тешко бидејќи жолчката се вари на пониска температура од белката. Ако го варите јајцето тврдо, може да добиете белузлава жолчка, додека со бавно готвење на ниска температура белките ќе ви излезат недосварени и ќе личат на желе, а не на белки.
Истражувачите свариле стотици јајца, а ја употребиле и математиката за да ја решат оваа кашеста загатка. Една од равенките се занимавала со тоа како патува топлината помеѓу топлата површина и јајцето; друга истражувала како содржината на јајцето се претвора од течна во состојба слична на гел, па до цврста состојба.
Нивниот конечен рецепт бил: ставете ги јајцата во решетка за готвење на пареа, наполнете две тенџериња – едното со зовриена вода, а другото со млака вода на температура од 30 Целзиусови степени. На секои две минути префрлајте ја решетката со јајцата од едното во другото тенџере – вкупно 32 минути. На крај пуштете ги под млаз вода да се оладат и излупете ги.
„Дефинитивно можете да го направите ова дома со околу пет-шест јајца“, вели Грегори Вајс, хемичар од Универзитетот во Калифорнија, Ирвин, кој не учествувал во истражувањето, пренесува АП.
Во методот предложен од истражувачите, наречен периодично готвење, белките се загреваат и се ладат додека целосно не се стегнат. Жолчката, пак, се држи на константна температура и се вари додека не стане кремлива.
„Речиси можете да го намачкате, како на леб“, вели авторката на студијата Емилија Ди Лоренцо од Универзитетот во Неапол Федерико II.
За да потврдат дека зготвиле нешто сосема ново, истражувачите го тестирале хемискиот состав на сварените јајца и ги сервирале пред панел од осум дегустатори заедно со традиционално варени јајца.
Истражувањето беше објавено во четвртокот во списанието Нејчр.
Оваа нова техника може да значи повеќе време во кујната во споредба со стандардното тврдо варено јајце, вели научничката за храна Џоан Славин од Универзитетот во Минесота, ама мешавината од текстури на јазикот може да вреди за потрошеното време.
„Ова е побавен процес за да се добие подобар исход“, вели Славин, која немала никаква улога во студијата.
