Оваа формација, чие име во превод значи „конусен рид“, се наоѓа во планинска област на границата помеѓу Перу и Бразил, позната како Сиера дел Дивизор.
Планините може да се видат во позадина на повеќето фотографии од Серо Ел Кон, но оваа формација е изолирана од другите врвови и има необична пирамидална форма, што ја издвојува од планинскиот масив.
Потеклото на необичниот врв е нејасно поради неговата оддалеченост и непристапност.
Додека некои извори сугерираат дека конусната формација би можела да биде изгаснат вулкан, други тврдат дека станува збор за необична карпеста формација.
Домородците на Амазон имаат поинакво објаснување за бизарната планина. Според перуанскиот весник Ла Република, Серо Ел Коно е духовен ентитет за локалните племиња и заедници, од кои некои го обожаваат врвот како „Андски Апу“ – свет планински бог или дух.
Во митологиите на Перу, Боливија и Еквадор, Апуи се суштества кои се појавиле од Земјата за да ги водат и заштитат луѓето што живеат во нивна близина.
Четврта теорија, за која нема докази, е дека Серо Ел Коно се наоѓа на урнатините на пирамида изградена од антички домородни племиња, пренесува Ла Република.
Серо Ел Коно се наоѓа во близина на реката Укајали, која е една од главните притоки на Амазон. Околната џунгла е жариште на биодиверзитетот и е дом на бројни загрозени видови, вклучувајќи џиновски армадили, јагуари и разни видови мајмуни, објави Гардијан.
Врвот е покриен со шума и е дел од поширокото подрачје кое се смета за приоритет во зачувувањето на биолошката разновидност од 90-тите години на минатиот век.
Загриженоста дека овој екосистем може да биде деградиран од инфраструктурата, нелегалната сеча и ископувањето злато го поттикнаа создавањето на националниот парк Сиера дел Дивизор во 2015 година.
