„Некои прехранбени производи не можат да издржат замрзнување без да го изгубат својот квалитет“, соопшти британската организација за заштита на потрошувачите, додавајќи дека одредени прехранбени производи едноставно не можат да издржат ниски температури без да го изгубат својот вкус, текстура или основни хранливи својства.
Повеќето луѓе знаат дека замрзнувањето е одлично решение за леб, месо, сирење, млеко, печурки, па дури и варен ориз. Експертите нагласуваат дека е важно храната да се замрзнува додека сè уште е во рок на траење, но и тогаш постои ризик некои од нив да го загубат својот квалитет.
Сепак, има прехрамбени производи кои треба да се чуваат подалеку од ледената зона.
Пржена и масна храна
Ако ви останало печено пилешко или пржени тиквички, можеби изгледа логично да ги ставите во замрзнувач. Но, експертите предупредуваат – резултатот ќе биде сè само не привлечен.
По одмрзнувањето, таквата храна често завршува во влажна и мрсна форма, бидејќи влагата и маслото не се распределуваат правилно. Додека замрзнатите индустриски производи како што е помфритот се специјално прилагодени на ниски температури, домашните верзии имаат потешкотии да ја одржат својата крцкавост.
Тврдо варени јајца
Една од најчестите грешки во домаќинството е ставањето варени јајца во замрзнувач. Иако се практични за правење сендвичи, експертите велат дека не треба да се замрзнуваат. Белките од јајцата по одмрзнувањето стануваат тврди, гумени и водени, што ги прави непривлечни за консумирање. Добрата вест е дека жолчките сè уште можат да се замрзнат, но само ако претходно се измешаат со малку сол или шеќер за да се спречи желатинска текстура.
Зеленчук со висока содржина на вода
Крцкавото е она што го прави зеленчукот привлечен, но тој квалитет засекогаш се губи во замрзнувачот. Краставиците, зелената салата и слична храна по одмрзнувањето се претвораат во каша. Исклучок се ситуациите кога планирате да ги користите за супи, сосови или смути, каде што дали се крцкави и онака не е важна.
Јогурт и павлака за готвење
„Иако можете да замрзнете јогурт, неговата текстура веројатно ќе се промени по одмрзнувањето, станувајќи воденаста, зрнеста или ледена“, се вели во анализата на британската организација за заштита на потрошувачите. Со други зборови, ако сте љубител на кремаста текстура, ќе бидете разочарани.
Истото важи и за павлаката – по одмрзнувањето може да стане зрнеста или да се одвои, па најдобро е да ја користите само во супи и сосови, никогаш за шлаг или свежи десерти.
Меки сирења
Додека тврдите сирења толерираат замрзнување без никакви проблеми и можат да траат и до два месеци, ситуацијата е поинаква со меките сирења. „Безбедно е да се замрзне меко сирење, но не се препорачува, бидејќи на крајот станува многу водено по одмрзнувањето. Ова ги вклучува сирењата како бри, фета и крем сирење“, нагласуваат експертите.
Значи, иако замрзнувањето е безбедно од хигиенска гледна точка, вкусот и текстурата повеќе нема да бидат исти по одмрзнувањето.
Како да се избегнат грешки
Советот од експертите е едноставен: секогаш проверувајте ја декларацијата. Повеќето производи кои можат да издржат замрзнување ќе имаат јасна ознака на пакувањето. Храната на која веќе ѝ е поминат рокот на траење никогаш не треба да се замрзнува. „Ако ја замрзнете после тоа, ризикот од труење со храна се зголемува.“
Меѓутоа, кога се одмрзнува, најважно е да се избегнат ненадејни промени во температурата. Преместувањето на храната директно во фрижидер е најбезбедната опција, особено кога станува збор за ризична храна како млеко или пилешко.
