Прва целосно персонализирана ДНК терапија кај бебе
Еден од најзначајните моменти беше третманот на бебе со ретко и смртоносно генетско нарушување, кај кое за првпат беше применета целосно персонализирана Крисп-терапија. Лекарите директно го коригираа оштетениот ген во црниот дроб, со што се намали потребата од постојани лекови и значително се подобри квалитетот на животот.
Иако детето ќе се следи цел живот, овој случај покажа дека прецизното уредување на ДНК може да стане реална терапија за други ретки болести.
Нови успеси со мРНА вакцините
Технологијата на мРНА вакцините, позната од пандемијата на ковид-19, во 2025 година доби нова улога. Клиничките испитувања покажаа силен имунолошки одговор против болести како ХИВ, а се истражува и нивната примена во лекување рак и одредени генетски нарушувања.
Резултатите се охрабрувачки, но потребни се дополнителни истражувања за долгорочната безбедност и ефикасност.
Трансплантацијата на органи од свиња во човек сè поблиску до пракса
Во 2025 година беше направен голем напредок во ксенотрансплантација. За првпат, генетски модифициран црн дроб од свиња беше трансплантиран кај жив пациент. Иако постапката е експериментална, органот успешно извршувал основни функции подолг период.
Ова отвора надеж за решавање на хроничниот недостиг од органи за трансплантација, проблем што секоја година одзема илјадници животи.
Живо човечко мозочно ткиво во истражување на деменцијата
Британски научници за првпат користеа живо човечко мозочно ткиво за проучување на раните фази на деменција. Со следење на тоа како токсичните протеини ги уништуваат врските меѓу мозочните клетки, тие добија увид што досега не беше можен.
Овој пристап може да го забрза развојот на терапии за Алцхајмеровата болест и другите форми на деменција.
Лекови за слабеење со поширока примена
Лековите за третман на дебелина и дијабетес покажаа потенцијал и во лекување други здравствени состојби, вклучувајќи одредени нарушувања во однесувањето и менталното здравје. Нивното дејство врз метаболизмот и воспаленијата може да донесе пошироки здравствени придобивки.
Сепак, научниците предупредуваат дека тие не се универзално решение и мора да се користат внимателно.
Поглед кон иднината
Медицинските достигнувања во 2025 година покажуваат дека здравствената наука влегува во период на брзи промени. Иако дел од овие терапии сè уште се во рана фаза, тие поставуваат темели за попрецизна, поефикасна и подостапна медицина во иднина.
