Светскиот ден на пчелите се слави во 20 мај и од друга причина, бидејќи во текот на овој месец, пчелите и природата доживуваат енергичен развој.
Како секој од нас може да им помогне на пчелите?
Можеме да се грижиме за зачувување на пчелите со садење медоносни растенија на нашите балкони, прозорски прагови, градини, полиња или јавни површини. Во нашите градини можеме да засадиме и медоносни дрвја како липа, дива цреша, леска и цвеќиња како што се американските јагоди, кои се исклучително лековити. Со садење на овие растенија, им помагаме на пчелите и другите опрашувачи, а се грижиме и за сопственото здравје и благосостојба.
Нови закани!
Воените зони, микропластиката и уличното осветлување претставуваат сè поголема закана за популацијата на пчели, предупредуваат научниците во новиот извештај од Универзитетот во Ридинг со наслов „Нови закани и можности за зачувување на глобалните опрашувачи“, пренесува Гардијан.
Тим експерти за пчели ги идентификуваше 12-те најитни закани за опрашувачите во следната деценија. Меѓу нив се:
Војните и вооружените конфликти, ги менуваат земјоделските практики и ја намалуваат разновидноста на земјоделските култури, оставајќи ги пчелите без храна дел од годината.
Микропластиката ги контаминира кошниците за пчели низ Европа – тестирањето на 315 колонии пчели покажа присуство на синтетички материјали како што е ПЕТ пластика во повеќето кошници.
Улично осветлување, кое ги намалува посетите на цвеќиња од страна на ноќните опрашувачи за дури 62 отсто.
Загадувањето на воздухот, кое влијае на преживувањето, размножувањето и растот на пчелите.
Антибиотиците во земјоделството, кои завршуваат во медот и во кошниците со пчели, го менуваат однесувањето на опрашувачите и ја намалуваат нивната активност.
„Коктели од пестициди“, кои, иако поединечно може да бидат под дозволените граници, во комбинација со други хемикалии можат да имаат штетни ефекти врз пчелите.
„Идентификувањето на нови закани и преземањето навремени мерки е клучно за спречување на понатамошни големи намалувања на бројот на опрашувачи. Ова не е само прашање на зачувување – пчелите се од суштинско значење за нашата безбедност на храната, отпорноста на климатските промени и економската стабилност. Со заштита на опрашувачите, се заштитуваме себеси“, истакна професорот Сајмон Потс, главен автор на извештајот.
„Ќе биде потребна колективна акција од сите нас за да се справиме со овие закани. Треба да ги зачуваме, управуваме и подобриме природните живеалишта за да обезбедиме безбеден простор за пчелите. Дури и едноставните активности, како што се садење цвеќе и обезбедување места за гнездење во вашите дворови, можат да имаат големо влијание. Но, тие мора да одат рака под рака со промените во политиките за да се направат градините, фармите, јавните простори и цели пејзажи погодни за опрашувачи“, додава доктор Дипа Сенапати, коавтор на извештајот.
