Паркот на чудовишта во шумата на градот Бомарцо е навистина парк полн со чудовишта направени од камен. Станува збор за комплекс од огромни камени споменици создадени во текот на 16 век.
Во шумската долина под замокот Орсини, има гротескни скулптури и мали градби среде природата. Така, можете да најдете голем воен слон кој лови војник, монструозна глава од риба, џин кој се обидува да преполови друг и слично.
Најстрашна од сите секако е огромната глава со преплашен израз кој изгледа како да вреска. Станува збор за богот Оркус, римскиот бог на подземјето, на чија горна усна пишува „Разумот исчезнува“. Друга интересна работа е што можете да влезете во главата на Оркус и да седнете на масата внатре.
Овој парк е нарачан во 1552 година од страна на принцот Пјер Франческо Орсини, познат како Вичино, и тој, пред сè, е одраз на неговото страдање. Тој не беше дизајниран да привлекува туристи со својата убавина, туку да шокира. Вичино го загубил својот најдобар пријател во трауматска војна, во која долго време бил затворен.
Потоа му се случила уште една голема трагедија. Набргу по враќањето од војната, починала неговата сакана сопруга Џулија Фарнезе.
Храмот на вечноста во паркот е посветен на Џулија. Својот дизајн му го доверил на архитектот Пиро Лигорио, почитуван архитект и уметник кој претходно ја завршил катедралата Свети Петар во Рим по смртта на Микеланџело.
Салвадор Дали го посетил паркот и бил маѓепсан од него. Тој бил толку инспириран што таму снимил краток филм, камените чудовишта инспирирале една од неговите познати слики „Искушението на Свети Антониј“ од 1946 година.
На околу два часа возење од Рим, паркот на чудовиштата дефинитивно вреди да се посети доколку се најдете во тој дел на Италија. Покрај тоа, можете да ги истражувате и шармантните градови Бомарцо и Витербо.
