Планетата, наречена ХД 137010 б со прекар „ледена Земја“, кружи околу ѕвезда слична на Сонцето и се проценува дека е околу шест проценти поголема од Земјата, пренесува Гардијан. Планетата има орбита од приближно 355 дена, слична на Земјината, но нејзината ѕвезда е постудена и потемна од Сонцето, поради што температурата на површината на планетата би можела да биде и под минус 70 степени Целзиусови.
Меѓународен тим научници од Австралија, Велика Британија, САД и Данска ја идентификуваа планетата, користејќи податоци собрани во 2017 година за време на продолжената мисија на вселенскиот телескоп Кеплер (К2) на НАСА. Сигналот е снимен кога планетата накратко поминала пред својата ѕвезда, предизвикувајќи слабо затемнување.
Според истражувачите, сигналот првично го забележале граѓани-научници во рамките на проектот „Ловци на планети“.
Научниците истакнуваат дека ги провериле податоците повеќе пати и дека откривањето се совпаѓа со типичен транзит на планета. Астрофизичари кои не биле вклучени во истражувањето велат дека откритието е значајно, но предупредуваат дека се потребни повеќе набљудувања на транзитот за потврда.
Исто така, се наведува дека планетата, иако е слична на Земјата по големина, би можела да биде и голем „леден свет“ со голем дел од водата во замрзната состојба.
