„Банката проценува дека најверојатно ќе има најмалку 5.000 жртви откако билетите биле пуштени во продажба и дека над 2 милиони фунти се изгубени на измамниците“, се вели во соопштението на банката објавено во средата. Банката ги доби овие податоци врз основа на сопствените клиенти, кои потоа беа проширени на остатокот од Обединетото Кралство.
Браќата Галагер, Лијам и Ноел, на крајот на август објавија дека повторно го формираат култниот бенд Oasis 15 години по нивното разделување и дека ќе одржат серија концерти во Обединетото Кралство и Ирска, што предизвика голема возбуда.
Но, хаотичната продажба на билети за концертите во Кардиф, Манчестер, Лондон, Единбург и Даблин, кои се распродадени во ист ден, предизвика гнев и фрустрација кај купувачите, кои се соочија со прекини на преполните платформи за продажба и покачување на цените во последен момент.
Потоа, измамите насочени кон разочараните фанови се шират на социјалните мрежи преку лажни реклами, понекогаш нудејќи билети по намалени цени, велат од банката.
Лојдс забележале околу 1.000 жртви меѓу своите клиенти, кои изгубиле во просек по 436 фунти. Еден од нив бил измамен со 1700 фунти. Девет од десет луѓе биле измамени на социјалните мрежи на Мета, од кои повеќето преку Фејсбук.
„Фактот што толку многу случаи започнуваат со лажни реклами на социјалните мрежи, честопати во спротивност со политиките на платформите, ја нагласува важноста овие компании да преземаат посилни мерки“, рече Лиз Зиглер, директор за спречување измами во банката Лојдс.
Од друга страна, британскиот регулатор за конкуренција, ЦМА, на почетокот на септември отвори истрага против препродавачот на билети Тикетмастер за да испита дали „на клиентите им биле доставени јасни информации“ и дали тие биле „под притисок да купат билети за краток временски период“. Според ЦМА, Тикетмастер продал повеќе од 900.000 билети за концертите на Oasis.
