Ова откритие е направено во текот на истражувањето за тоа кои карактеристики го спречуваат развојот на тумори кај желките, пренесува Телеграф.
Иако е типично за големите и долговечни животни да имаат поголем ризик од развој на болеста, се чини дека желките му пркосат на ова, а причината за тоа можеби е нивната силна одбрана против клетките кои предизвикуваат оштетување и го забавуваат метаболизмот, што го намалува клеточниот стрес, изјавија научниците.
Во исто време, тие имаат уникатни гени кои ги штитат од рак, покажа истражувањето.
Научниците анализирале медицински податоци од обдукции на стотици желки, вклучувајќи и некои од зоолошката градина Честер во Чешир, и откриле дека само еден процент од овие животни имале рак, што е многу помал број отколку кај цицачите или птиците.
Тие, исто така, откриле дека, дури и кога се појавуваат тумори, тие речиси никогаш не се шират.
Некои видови желки живеат повеќе од 100 години, џиновските видови од Галапагос и Алдабра живеат повеќе од 150 години. Во април, женка желка од овој вид стана мајка за прв пат по 100 години во зоолошката градина во Филаделфија.
Истражувачите истакнаа дека најновите наоди покажуваат колку е важно да се заштитат загрозените видови.
„Студијата покажува дека желките се модел за разбирање на отпорноста на рак и пример за здраво стареење“, нагласи научникот Иленија Кјари.
Истражувачот Скот Глаберман додаде дека биодиверзитетот може да нè научи многу за начинот на кој функционира светот.
„Фасцинантни видови како џиновските желки можеби веќе решиле многу од проблемите со кои се соочуваат луѓето, вклучувајќи ги и оние поврзани со стареењето и ракот. Затоа е двојно важно да се заштити биодиверзитетот“, заклучи тој.
