Германската полиција бара необичен плен откако контејнер полн со овошни желеа и гумени бонбони беше украден од камион паркиран во близина на автопат на северот од земјата, објави германската новинска агенција ДПА.
Инцидентот се случил во вторник во близина на градот Нојштат-Глеве. Возачот на камионот го паркирал возилото на постојка покрај автопатот околу 8 часот наутро и го оставил без надзор во текот на денот. Кога се вратил вечерта, следел шок – контејнерот исчезнал, а со него и 15 тони „вкусен товар“.
Според полицискиот извештај, вредноста на украдените слатки се проценува на 250.000 евра.
Полицијата во моментов не е сигурна како сторителите успеале да го отстранат и однесат целиот контејнер од камионот без никој да забележи, среде бел ден на сообраќајна станица.
„Истражуваме како е можно незабележано да се подигне контејнер од товарно возило на јавно место“, се наведува во соопштението на полицијата.
