Новооткриената галаксија се наоѓа на црвено поместување од „зет = 1,156“, што значи дека ја набљудуваме каква што била пред околу 8,5 милијарди години, кога универзумот бил многу помлад, објаснува научното списание.
Откритието, како што денес пренесува Еуроњуз, е резултат на работата на тим од Универзитетот Вотерлу во Канада, кој го забележал необичниот објект при анализа на длабински набљудувања на вселената.
„Галаксиите-медузи“ го добиле името по долгите, светлечки млазови гас што се протегаат зад нив како пипала. Тие се движат со голема брзина низ густи јата од галаксии исполнети со екстремно топол гас, кој делува како силен ветер и го носи материјалот подалеку од галаксијата во процес познат како отстранување под притисок на рам.
Тимот научници до откритието дојде проучувајќи го полето Космос, едно од најтемелно истражените подрачја, кое се наоѓа надвор од рамнината на Млечниот Пат, со што се избегнуваат интерференции од блиските ѕвезди и космичката прашина. Како што наведе доктор Ијан Робертс од Центарот за астрономија на Универзитетот Ватерлу, истражувачите во раната фаза на анализа на податоците од телескопот забележале далечна и до тогаш незабележана „галаксија медуза“, што веднаш привлече внимание.
Галаксијата има типична форма на диск, но по должината на нејзините гасни „опашки“ се наоѓаат светло сини јазли, кои претставуваат екстремно млади ѕвезди. Нивната возраст укажува дека се формирале надвор од главното тело на галаксијата, во гас кој претходно бил откинат.
Значењето на откритието лежи во фактот што ги поместува доказите за отстранување на гас под притисок многу подалеку во времето отколку што се сметаше претходно.
Научниците претпоставуваа дека галактичките јата пред 8,5 милијарди години сè уште биле во фаза на формирање и не биле доволно густи за да ја променат структурата на галаксиите толку ефикасно.
Истражувачите побараа дополнително време за набљудување со телескопот Џејмс Веб за подетално да ја проучат оваа галаксија и да добијат дополнителни докази.
Вселенскиот телескоп Џејмс Веб, лансиран во 2021 година во соработка со американските, европските и канадските вселенски агенции, е најголемиот и најнапредниот телескоп некогаш испратен во вселената.
