Наодите потекнуваат од студија што ја спровеле статистичари од Универзитетот Еразмус во Тилбург и Ротердам, кои ја анализирале возраста на која починале 75.000 луѓе во Холандија во текот на 30 години пред 2017 година. Интересно е што тие не се фокусирале на очекуваниот животен век за да дојдат до своите заклучоци. Наместо тоа, истражувачите сакале да испитаат колку долго поединец може да живее доколку се грижи за себе и доколку животот не му биде прекинат од болест или други околности, пренесува Унилад.
Колку долго можат да живеат максимално луѓето?
Земајќи предвид колку години имале луѓето во студијата кога починале, истражувачите откриле дека максималниот животен век за една личност е во 90-тите години, но тоа не значи дека таму завршува сè. Истражувачите сугерирале дека е малку веројатно човек да живее подолго од 115 години, но откриле и дека жените имаат нешто подолг животен век од мажите.
Додека максималниот животен век за жените изнесувал 115,7 години, се проценува дека мажите достигнуваат максимална возраст од 114,1 година.
„Секако дека просечниот животен век се зголемил. Меѓутоа, самата максимална горна граница не се променила“, изјавил за Франс прес професорот Џон Ајнмал, еден од тројцата научници кои ја спровеле студијата.
И покрај наодите на истражувачите, Ајнмал признал дека постојат случаи во кои луѓето ја надминуваат нормата и живеат подолго од предложениот максимален животен век. Најстариот маж, според Гинисовата книга на рекорди, бил Јапонец по име Џироемон Кимура, кој живеел 116 години.
На почетокот на минатата година, француската калуѓерка Андре починала во длабока старост од 118 години. По нејзината смрт, Гинисовата книга на рекорди ја прогласила Марија Брањас Морера, родена во САД, за најстара жива личност во светот, со 115 години.
Во интервју од 2019 година, Морера својата долговечност ја припишала на „уреден живот кој бил општествено многу пријатен, добар и без инциденти“.
Морера е родена во Сан Франциско, Калифорнија, на 4 март 1907 година, а во Каталонија се преселила во 1914 година, пред да почине во август оваа година на 117 години.
