Најдлабокиот гасен хидрат во светот откриен кај Гренланд, преполн со живот
На дното на океанот западно од Гренланд е откриена залиха на природен гас заробена во леден кафез, која би можела да биде најдлабокиот досега забележан ладен извор на гасен хидрат, а во исто време изобилува со животински свет. Ова уникатно живеалиште, наречено Фреја, е пронајдено на длабочина од дури 3640 метри, пренесува Саенс алерт.
Неочекувано откритие во арктичките длабочини
Наслагите на гасен хидрат Фреја се откриени за време на експедиција која ја предводеле истражувачи од Арктичкиот универзитет на Норвешка (УиТ). Гасните меурчиња во водениот столб ги предупредиле научниците на необична активност длабоко под нивниот брод, што ги поттикнало да испратат далечински управувано возило (РОВ) за да истражат за што станува збор.
На морското дно наишле на изложени наслаги од кристален материјал познат како гасен хидрат – замрзната мешавина од метан и вода, која се одржува во цврста состојба поради високиот притисок и ниските температури. РОВ собрал примероци од метан, сурова нафта и седимент што содржел изненадувачка разновидност на морски живот.
„Ова откритие е пресвртница за екосистемите во арктичките длабоки мориња и циркулирањето на јаглеродот“, изјави заменикот раководител на експедицијата Џулијана Паниери. „Пронајдовме ултра-длабок систем кој е геолошки динамичен и биолошки богат, со импликации за биодиверзитетот, климатските процеси и идното управување со Високиот Север.“
Живот без сончева светлина
Животните од длабоките мориња што ги населуваат наслагите Фреја не зависат од Сонцето. Наместо тоа, тие се хранат со хемотрофни микроби кои хемикалии како метан, сулфиди и други јаглеводороди ги претвораат во биолошко гориво. Токму овие супстанции истекуваат од морското дно на новооткриените локации.
Меѓу откриените животни има цевчести црви, ракови слични на козички, четинести црви и школки.
Научниците истакнуваат дека овој екосистем по својот состав е сличен на арктичките хидротермални извори на слични длабочини. Соединенијата пронајдени во седиментот укажуваат дека нафтата и гасот потекнуваат од цветни растенија што растеле на некогаш топлиот и шумовит Гренланд за време на миоценот, пред 23 до 5,3 милиони години.
Закана од рударство во длабоки води
Ваквите наслаги богати со јаглерод ја прават Фреја идеално живеалиште за специјализирани организми, но и цел на интерес на рударската индустрија и на некои влади. Иако рударството во длабоки мориња досега се фокусираше на полиметални нодули богати со ретки минерали, гасните хидрати претставуваат потенцијален енергетски ресурс.
„И покрај значителниот напредок во разбирањето на распределбата и концентрацијата на гасните хидрати, голем предизвик останува проценката на гасните хидрати како енергетски ресурс и нивната улога во глобалните климатски промени“, наведуваат авторите на студијата објавена во списанието Комуникации на природата.
Научниците предупредуваат на опасностите што таквите активности ги претставуваат за кревките и сè уште недоволно истражени екосистеми.
„Веројатно постојат уште многу длабоки ладни извори како Фреја што чекаат да бидат откриени, а морскиот живот што успева околу нив би можел да биде клучен за биодиверзитетот на длабокиот Арктик“, изјави морскиот еколог Џон Копли од Универзитетот во Саутемптон, кој учествувал во експедицијата.
„Врските што ги откривме меѓу животот на овој извор и хидротермалните извори на Арктикот укажуваат дека овие живеалишта, слични на острови на океанското дно, ќе треба да бидат заштитени од сите идни влијанија на рударство во длабоки води во регионот“, заклучи Копли.
