Истражувањето „Beyond the Buzz 2025“ покажа дека четвртина од младите луѓе кои во моментов консумираат алкохол планираат да го намалат внесувањето на алкохол во наредната година. Но, овој тренд не е само минлива мода, туку дел од една подлабока културна промена.
Постојат три главни причини зошто младите сè повеќе го избегнуваат алкохолот:
- Личен избор (53 отсто) – сè поголем број млади луѓе самостојно одлучуваат да го ограничат или целосно да го елиминираат алкохолот, без надворешен притисок.
- Здравје и благосостојба (48 отсто) – достапноста на информации за здравјето ги мотивира за подобра физичка и психичка состојба.
- Финансии (39 отсто) – наместо да трошат пари на алкохол, тие претпочитаат да ги инвестираат во патување, здравје и слични работи.
Она што е особено интересно е што младите не се откажуваат од социјалните аспекти на пиењето. Наместо тоа, тие сè почесто избираат безалкохолни коктели, пива и аперитиви, за да ги одржат ритуалите, но без последици од алкохолот.
Денеска понудата е поголема од кога било – наместо обични минерални или премногу засладени сокови, пазарот нуди креативни, софистицирани и функционални пијалоци.
Сè повеќе млади луѓе се приклучуваат на таканареченото движење „Трезвено љубопитно“ – начин на живот во кој алкохолот свесно се намалува, но без притисок целосно да се избегне.
Истражувањата покажуваат дека:
- За овој тренд првпат слушнале 36 отсто од младите преку социјалните мрежи
- 14 отсто биле запознаени од инфлуенсер во областа на здравјето и благосостојбата
- Дури 52 отсто од членовите на генерацијата Зет и миленијалците планираат активно да учествуваат во ова движење во текот на 2025 година.
За производителите и рестораните, овој тренд не е закана, туку одлична можност. Сè повеќе брендови развиваат иновативни линии на производи без алкохол, инвестираат во маркетинг насочен кон здравјето и свесните потрошувачи и ги прилагодуваат понудите на баровите и рестораните.
Експертите велат дека ова не е крај на социјалното пиење – туку почеток на нова ера на свесно консумирање, каде квалитетот и здравјето имаат предност пред квантитетот и навиката, пренесува Индекс.
