Научниците го испитуваат она што се нарекува „климатски промени зависни од надморската височина“, феномен во кој промените во животната средина можат да се забрзаат на поголеми надморски височини, пренесува ЈурекАлерт.
Студијата претставува најтемелна анализа досега за тоа како се менуваат моделите на температура, дожд и снежни врнежи низ планинските венци во светот.
Предводен од д-р Ник Пепин, професор на Универзитетот во Портсмут, истражувачкиот тим анализирал податоци од повеќе извори, вклучувајќи ги и глобалните мрежни збирки на податоци, заедно со детални студии на случаи на специфични планински венци, вклучувајќи ги Карпестите Планини, Алпите, Андите и Тибетската висорамнина. Резултатите откриваат загрижувачки трендови помеѓу 1980 и 2020 година:
Температура: Планинските региони се затоплуваат во просек за 0,21 степени на век побрзо од околните низини.
Врнежи и снег: Планините се соочуваат со непредвидливи врнежи од дожд и значително преминување од снег кон дожд.
„Планините делат многу карактеристики со арктичките региони и минуваат низ слични брзи промени. Тоа е затоа што и двете средини забрзано губат снег и мраз и се соочуваат со длабоки промени во екосистемите. Она што е помалку познато е дека, како што се искачувате повисоко во планините, стапката на климатските промени може да стане уште поинтензивна“, изјави д-р Пепин од Институтот за животна средина и науки за Земјата на Универзитетот во Портсмут
Последиците одат многу подалеку од планинските заедници. Повеќе од милијарда луѓе ширум светот зависат од планинскиот снег и глечерите за снабдување со вода, вклучувајќи ги и луѓето во Кина и Индија, најнаселените земји во светот, кои ја добиваат својата вода од Хималаите.
„Мразот на Хималаите се намалува побрзо отколку што мислевме. Кога има промена од снежни врнежи на дожд како што се затоплува времето, постои поголема веројатност за катастрофални поплави. Опасните настани стануваат и поекстремни. Со зголемувањето на температурите, дрвјата и животните се селат кон повисоките делови од планините, барајќи постудени услови. Но, на крајот, во некои случаи, тие ќе избегаат од планините и ќе бидат потиснати од врвот. Немајќи каде на друго место да одат, видовите би можеле да исчезнат, а екосистемите би можеле суштински да се променат“, рече д-р Пепин.
